<
மெல்லிசை மன்னர் எம்.எஸ்.விஸ்வநாதனுக்கு நினைவிடம் - கேரள அரசு ரூ.1 கோடி நிதி ஒதுக்கீடு
மெல்லிசை மன்னர் எம்.எஸ்.விஸ்வநாதனுக்கு நினைவிடம் கட்ட ரூ.1 கோடி நிதி ஒதுக்கீடு செய்து கேரள அரசு உத்தரவிட்டுள்ளது.
திருவனந்தபுரம்,
கேரள முதல்-மந்திரி பினராயி விஜயன் தலைமையிலான கேரள அரசின் இந்த ஆண்டுக்கான பட்ஜெட் அறிக்கை நேற்று முன்தினம் வெளியிடப்பட்டது. அதில், கலைத்துறையின் கலைகளில் சிறந்த விளங்கியவர்களை கௌரவிக்கும் வகையில் சில திட்டங்கள் அறிவிக்கப்பட்டன.
அதன்படியே, பாலக்காடு அருகே உள்ள எலப்புள்ளி கிராமப் பகுதியில் மெல்லிசை மன்னர் எம்.எஸ்.விஸ்வநாதனுக்கு நினைவிடம் கட்டப்படும் என்றும் அதற்காக ரூ.1 கோடி ஒதுக்கீடு செய்தும் பட்ஜெட்டில் அறிவிக்கப்பட்டது.
கேரளாவின் பாலக்காடு அருகே உள்ள எலப்புள்ளி கிராமத்தில் 1928 ஆம் ஆண்டு பிறந்தவர் எம்.எஸ்.விஸ்வநாதன். 4 வயதில் தந்தையை இழந்தவர், கண்ணனூரில் தாத்தா வீட்டில் வளர்ந்தார். சிறு வயதில் தியேட்டர்களில் நொறுக்குத் தீனி விற்று நீலகண்ட பாகவதரிடம் இசை பயின்றார். 13 வயதில் மேடைக் கச்சேரி நிகழ்த்தினார்.
மேலும் சினிமா கம்பெனியில் சர்வராக வேலை பார்த்தார். பிறகு, இசையமைப்பாளர் சி.ஆர்.சுப்புராமன் குழுவில் இவர் ஆர்மோனியக் கலைஞராகவும், டி.கே.ராமமூர்த்தி வயலின் கலைஞராகவும் சேர்ந்தனர். 1953-ம் ஆண்டு வெளியான ‘ஜெனோவா’ படத்துக்காக முதல் முறையாக இசையமைத்தார்.
மெல்லிசை மன்னர், கலைமாமணி, திரை இசை சக்கரவர்த்தி உள்ளிட்ட பல பட்டங்களையும் ஃபிலிம்பேர் வாழ்நாள் சாதனையாளர் விருது உட்பட பல விருதுகளையும் பெற்றவர்.
கடந்த 2015 ஆம் ஆண்டு மறைந்த எம்.எஸ்.விஸ்வநாதனை கவுரவப்படுத்தும் விதமாக, அவருக்கு நினைவு மண்டபம் கட்ட கேரள அரசு முடிவு செய்து முதற்கட்டமாக ரூ.1 கோடி நிதி ஒதுக்கீடு செய்துள்ளது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
