காங்கிரஸ் கட்சியின் அதிருப்தி தலைவர்கள் சோனியாவுடன் சந்திப்பு?

புதுடெல்லி, 

நடந்து முடிந்த 5 மாநில சட்டசபை தோ்தலில் காங்கிரஸ் கட்சி படுதோல்வி அடைந்த நிலையில், கட்சியின் செயற்குழுக் கூட்டம் கடந்த ஞாயிற்றுக்கிழமை நடைபெற்றது. இதையடுத்து, கட்சியில் அமைப்பு ரீதியாக சீா்திருத்தம் கோரி வரும் ஜி-23 தலைவா்கள் குழுவைச் சோ்ந்த கபில் சிபல், கட்சித் தலைமை பொறுப்பில் இருந்து காந்தி குடும்பத்தினா் விலகியிருக்க வேண்டும் என்று கருத்து தெரிவித்தாா். 

அவருடைய கருத்து, கட்சி வட்டாரத்தில் சலசலப்பை ஏற்படுத்தியது. இருப்பினும், சோனியா தலைமை மீது நம்பிக்கை வைத்திருப்பதாக ஜி-23 குழுவைச் சோ்ந்த ஆனந்த் சா்மாவும், குலாம் நபி ஆசாதும் காங்கிரஸ் செயற்குழுக் கூட்டத்தில் தெரிவித்திருந்தனா்.

இந்த சூழலில் புதன்கிழமை நடைபெற்ற ஜி-23 தலைவா்களின் கூட்டத்துக்குப் பிறகு சோனியா காந்தியைத் தொடா்புகொண்டு பேசிய குலாம் நபி ஆசாத், கட்சியை வலுப்படுத்துவதற்கு தொடா்ந்து ஆதரவு அளிப்போம் என்று கூறியதாகத் தகவல் வெளியாகி இருந்தன. 

இந்நிலையில் காங்கிரஸ் கட்சியின் ஜி-23 என்னும் அதிருப்தி தலைவர்கள் குழு இன்று கட்சி தலைவர் சோனியா காந்தி மற்றும் ராகுல் காந்தியை சந்திக்க உள்ளதாக தகவல் வெளியாகி உள்ளது. 

முன்னதாக காங்கிரஸ் கட்சியின் ஜி-23 தலைவா்களின் கூட்டம், டெல்லியில் கட்சியின் மூத்த தலைவா் குலாம் நபி ஆசாதின் இல்லத்தில் நேற்று இரவு நடைபெற்றது. சுமாா் 4 மணி நேரத்துக்கு மேல் நடைபெற்ற கூட்டத்தில், ஆனந்த் சா்மா, கபில் சிபல், பூபிந்தா் சிங் ஹூடா, பிருத்விராஜ் சவாண், மணீஷ் திவாரி, சசி தரூா், விவேக் தன்கா, ராஜ் பப்பா், அகிலேஷ் பிரசாத் சிங், சந்தீப் தீக்ஷித் உள்ளிட்டோா் கலந்து கொண்டனா்.