கொலை வழக்கில் தலைமறைவு; 15 ஆண்டுகளுக்கு பின் கைது

பெங்களூரு:-

பெங்களூரு கூட்லு கேட் பகுதியில் கடந்த 2002-ம் ஆண்டு தமிழ்நாட்டை சேர்ந்த லாரி டிரைவர் செபாஸ்டின் என்பவர் கொலை செய்யப்பட்டார். இந்த கொலை தொடர்பாக மங்கமனபாளையா பகுதியை சேர்ந்த சுகைல், சங்கர் ஆகியோரை மடிவாளா போலீசார் கைது செய்து சிறையில் அடைத்தனர். கடந்த 2007-ம் ஆண்டு சுகைலும், சங்கரும்

ஜாமீனில் வெளியே வந்து தலைமறைவானார்கள். சமீபத்தில் சங்கர் இறந்தது பற்றி போலீசாருக்கு தெரியவந்தது. சுகைலை போலீசார் தேடிவந்தனர். இந்த நிலையில் சுகைல் தனது பெயரை மாற்றிக்கொண்டு ஆயுர்வேத டாக்டராக பணியாற்றி வந்தது தெரியவந்தது. இதனால் அவரை நேற்று முன்தினம் போலீசார் கைது செய்தனர். தலைமறைவாக இருந்த சுகைல் 15 ஆண்டுகளுக்கு பின்பு கைதாகி இருப்பது குறிப்பிடத்தக்கது.