கர்நாடகம்-மராட்டியம் இடையே எல்லை பிரச்சினை வழக்கு

பெங்களூரு:-

வக்கீல்கள் குழு

கர்நாடகம்-மராட்டியம் இடையே எல்லை பிரச்சினை நீண்ட காலமாக நீடித்து வருகிறது. பெலகாவி தங்களுக்கே சொந்தம் என்று மராட்டியம் கூறி வருகிறது. ஆனால் எல்லை பிரச்சினை எழும் போதெல்லாம் பெலகாவி கர்நாடகத்தின் ஒருங்கிணைந்த பகுதி என்று கர்நாடகம் அந்த மாநிலத்திற்கு பதிலடி தருகிறது. இந்த எல்லை பிரச்சினை தொடர்பான வழக்கு சுப்ரீம் கோர்ட்டில் நிலுவையில் உள்ளது. இந்த எல்லை பிரச்சினை தொடர்பாக தற்போது இரு மாநில எல்லையில் பதற்றமான சூழல் நிலவுகிறது.

இந்த நிலையில் அந்த வழக்கு சுப்ரீம் கோர்ட்டில் 30-ந் தேதி(அதாவது இன்று) விசாரணைக்கு எடுத்து கொள்ளப்படும் என்று அறிவிக்கப்பட்டு இருந்தது. இதற்காக இரு மாநிலங்களும் தங்கள் தரப்பு வாதங்களை எடுத்து வைக்க வக்கீல்கள் குழுவை அமைத்தன. கர்நாடகம் சார்பில் வாதாட மூத்த வக்கீல் முகுல் ரோத்தகி தலைமையில் குழு அமைக்கப்பட்டது. முதல்-மந்திரி பசவராஜ் பொம்மை டெல்லி சென்று வக்கீல் முகுல் ரோத்தகியை நேரில் சந்தித்து இதுகுறித்து ஆலோசனை நடத்தினார்.

விசாரணை நடைபெறாது

இந்த நிலையில் எல்லை பிரச்சினை தொடர்பான மனு மீது சுப்ரீம் கோர்ட்டில் இன்று (புதன்கிழமை) விசாரணை நடைபெறாது என்று தகவல் வெளியாகியுள்ளது. இந்த வழக்கை விசாரிக்கும் நீதிபதி வேறு ஒரு வழக்கை விசாரிக்க இருப்பதால், எல்லை பிரச்சினை மனு மீதான விசாரணை தள்ளிப்போவதாக தகவல் வெளியாகியுள்ளது.