மலவள்ளியில் மின்சாரம் தாக்கி தமிழக வாலிபர் சாவு

மண்டியா:

மண்டியா மாவட்டம் மலவள்ளி தாலுகா துக்கஹள்ளி கிராமத்தில் வசித்து வருபவர் கணேஷ்(வயது 22). தமிழகத்தை சேர்ந்தவர் ஆவார். இவர், தமிழகத்தை சேர்ந்த கட்டுமான தொழில் குழுவினருடன் வந்து அப்பகுதியில் வேலை செய்து வந்தார். இந்த நிலையில் நேற்று வழக்கம்போல் கட்டுமான வேலையில் ஈடுபட்டார். இதற்கிடையே கணேஷ் அங்குள்ள கோவில் அருகே உள்ள தண்ணீர் தொட்டியில் தண்ணீர் எடுக்க முயன்றார்.

அப்போது அவர் மீது மின்சாரம் பாய்ந்தது. இதில் மின்சாரம் தாக்கி சம்பவ இடத்திலேயே கணஷே் பரிதாபமாக உயிரிழந்தார். இதுபற்றி தகவல் அறிந்த மலவள்ளி போலீசார் சம்பவ இடத்திற்கு விரைந்து வந்தனர். பின்னர் மின்சாரம் தாக்கி பலியான கணேசின் உடலை கைப்பற்றி அரசு ஆஸ்பத்திரிக்கு அனுப்பி வைத்தனர். தண்ணீர் தொட்டியில் மின்சாரம் எப்படி பாய்ந்தது என்பது தெரியவில்லை. இதுகுறித்து மலவள்ளி போலீசார் வழக்குப்பதிவு செய்து விசாரணை நடத்தி வருகின்றனர்.