டெல்லியில் கொரோனா பாதிப்பு மீண்டும் அதிகரிப்பு

புதுடெல்லி,

தலைநகர் டெல்லியில் கொரோனா பாதிப்பு மீண்டும் அதிகரிக்கத்தொடங்கியுள்ளது. கடந்த 10 தினங்களில் மட்டும் 19,760- பேருக்கு கொரோனா பாதிப்பு உறுதி செய்யப்பட்டுள்ளது. அதேபோல், டெல்லியில் கட்டுப்படுத்தப்பட்ட பகுதிகள் எண்ணிக்கையும் 50 சதவீதம் அதிகரித்து இருப்பது மக்களுக்கு அதிர்ச்சியை அளித்துள்ளது.

கடந்த 1 ஆம் தேதி தொற்று பரவல் விகிதம் 11.41 ஆக இருந்தது. 2 பேர் பலியாகி இருந்தனர். ஆனால், அடுத்த சில நாட்களில் தொற்று பரவல் இரு மடங்காக உயர்ந்துள்ளது. கடந்த 180 நாட்களில் இல்லாத அளவுக்கு தொற்று பாதிப்பால் ஒரே நாளில் நேற்று 8 பேர் உயிரிழந்து இருந்தனர். பரவல் விகிதமும் 17.83 சதவிகிதமாக உயர்ந்துள்ளது. கடந்த 10 தினங்களில் 40 பேர் உயிரிழந்து உள்ளனர். கொரோனா பரவல் வேகம் எடுத்தாலும் பெரும்பாலானோருக்கு அறிகுறிகள் இல்லை என்றும் மக்கள் அச்சம் அடைய வேண்டாம் எனவும் கெஜ்ரிவால் கூறியுள்ளார்.