ஜனாதிபதி மாளிகையில் திரவுபதி முர்முவை வரவேற்ற ராம்நாத் கோவிந்த்...!

புதுடெல்லி,

ஜனாதிபதி தேர்தலில் பாஜக வேட்பாளராக போட்டியிட்ட திரவுபதி முர்மு வெற்றிபெற்றார். இதன் மூலம் நாட்டின் 15-வது ஜனாதிபதியாக திரவுபதி முர்மு தேர்ந்தெடுக்கப்பட்டுள்ளார்.

நாட்டில் பழங்குடி இனத்தை சேர்ந்த முதல் ஜனாதிபதி மற்றும் 2-வது பெண் ஜனாதிபதி என்ற பெருமையை திரவுபதி முர்மு பெறுகிறார்.

இதற்கிடையில், புதிய ஜனாதிபதியாக திரவுபதி முர்மு இன்று பதவியேற்கிறார். டெல்லி நாடாளுமன்ற மைய மண்டபத்தில் புதிய ஜனாதிபதி பதவி ஏற்பு விழா இன்று காலை 10.15 மணிக்கு நடைபெறுகிறது.

சுப்ரீம் கோர்ட்டு தலைமை நீதிபதி என்.வி. ரமணா நாட்டின் 15-வது ஜனாதிபதியாக திரவுபதி முர்முவுக்கு பதவிப்பிரமாணம் செய்து வைக்கிறார்.

இந்நிலையில், பதவி ஏற்பு விழாவுக்கு முன்னதாக திரவுபதி முர்மு ஜனாதிபதி மாளிகைக்கு சென்றார். அங்கு திரவுபதி முர்முவை ராம்நாத் கோவிந்த் வரவேற்றார்.

புதிய ஜனாதிபதியாக பதவியேற்க உள்ள திரவுபதி முர்முவுக்கு ராம்நாத் கோவிந்த் மலர் கொத்து கொடுத்து வரவேற்றார்.

இதனை தொடர்ந்து, ராம்நாத் கோவிந்துடன் புதிய ஜனாதிபதியாக பதவியேற்க உள்ள திரவுபதி முர்மு நாடாளுமன்றத்திற்கு புறப்பட்டு செல்கிறார். நாடாளுமன்ற மைய வளாகத்தில் சுப்ரீம் கோர்ட்டு தலைமை நீதிபதி என்.வி.ரமணா திரவுபதி முர்வுக்கு பதவி பிரமாணம் செய்துவைக்கிறார்.