திருப்பதி: டிராக்டரின் கலப்பையில் சிக்கிய சிறுவன் 3 துண்டுகளாக சிதறி பலி...!

ஸ்ரீகாளஹஸ்தி,

திருப்பதி மாவட்டம் ஸ்ரீகாளஹஸ்தி மண்டலம் வேடாம் கிராமத்தில் வசித்து வருபவர் முனிசந்திரா, விவசாயி. இவர், 20 ஆண்டுகளுக்கு முன்பு ஸ்ரீகாளஹஸ்தி மண்டலம் டி.எம்.வி.கண்டிகையில் இருந்து வேடாம் கிராமத்துக்கு வேலைத் தேடி வந்தார்.

அவருக்கும், அதே பகுதியைச் சேர்ந்த முனிராதா என்பவருக்கும் கடந்த 6 ஆண்டுகளுக்கு முன்பு திருமணம் நடந்தது. அவர்களுக்கு 1½ வயதில் தேவான்ஸ் என்ற மகன் உண்டு. இவர்களின் உறவினர் மகேஷ் தனது நிலத்தில் டிராக்டரில் ரொட்டோவேட்டர் கலப்பையை இணைந்து உழவுப்பணியில் ஈடுபட்டார்.

முனிசந்திரா தனது ஒரே மகன் தேவான்சை தூக்கி கொண்டு மகேசின் நிலத்துக்குச் சென்றார். அங்கு தேவான்ஸ் அழுதுக் கொண்டிருந்தான். இதைப் பார்த்த மகேஷ், சிறுவனை தூக்கி டிராக்டரில் உட்கார வைத்துக் கொண்டார்.

சிறுவன் டிராக்டரில் அமர்ந்திருந்ததை மறந்த மகேஷ் வேகமாக ஓட்டினார். ஓடும் டிராக்டரில் இருந்து சிறுவன் திடீரெனத் தவறி கீேழ சேற்றில் விழுந்தான். அப்போது சுழலும் ரோட்டோவேட்டர் கலப்பையில் சிக்கிய தேவான்ஸ் 3 துண்டுகளாக சிதறி பலியானான்.

இதுகுறித்து தகவல் அறிந்ததும் ஸ்ரீகாளஹஸ்தி புறநகர் போலீசார் சம்பவ இடத்துக்கு விரைந்து சென்று விசாரணை நடத்தினர்.