அகோலாவில் 5 வயது மகளை கொலை செய்து நாடகமாடிய தாய் கைது

மும்பை,

மராட்டியத்தில் 5 வயது மகளை கொலை செய்து நாடகமாடிய தாயை போலீசார் கைது செய்தனர்.

5 வயது மகள் கொலை

அகோலாவை சேர்ந்தவர் ரவி ஆம்லே. இவரது மனைவி விஜயா (31). இவர்களின் மகள் கிஷோரி (5). கடந்த 2-ந் தேதி வீட்டில் இருந்த மகள் கிஷோரி உயிரிழந்ததாக தாய் விஜயா போலீசாருக்கு தகவல் தெரிவித்தார். இதன்பேரில் போலீசார் அங்கு விரைந்து சென்று சிறுமியின் உடலை மீட்டு பிரேத பரிசோதனைக்கு அனுப்பி வைத்தனர். அங்கு நடத்திய பரிசோதனையில் சிறுமி மூச்சு திணறடித்து கொலை செய்யப்பட்டது தெரியவந்தது.

தாய் கைது

இதுபற்றி போலீசாரின் சந்தேகப்பார்வை விஜயா மீது விழுந்தது. அவரிடம் கிடுக்கிப்பிடியாக நடத்திய விசாரணையில், மகளை கொலை செய்து நாடகமாடியது தெரியவந்தது. இதையடுத்து போலீசார் கொலை வழக்குப்பதிவு செய்து விஜயாவை கைது செய்தனர். மேலும் இதற்கான காரணம் குறித்து விசாரணை நடத்தி வருகின்றனர். பெற்ற மகளை கொலை செய்து நாடகமாடிய பெண் கைது செய்யப்பட்ட சம்பவம் அப்பகுதியில் பரபரப்பை ஏற்படுத்தி உள்ளது.