செம்பூரில் டேங்கர் லாரி மோதி சிறுவன், சிறுமி பலி

மும்பை,

செம்பூரில் டேங்கர் லாரி மோதிய விபத்தில் சிறுவன், சிறுமி பலியாகினர். அவர்களது தாய் படுகாயம் அடைந்தார்.

லாரி மோதியது

மும்பை செம்பூர் பகுதியை சேர்ந்த பெண் ரஞ்சனா. இவர் தனது 3 வயது மகள் ஸ்ரீஸ்டியை மருத்துவ பரிசோதனைக்காக டாக்டரிடம் அழைத்து செல்ல மகன் ரிஷி குப்தா (3) உடன் சென்றார். அங்குள்ள ஓட்டல் அருகே சாலையை கடக்க 3 பேரும் ஓரமாக நின்றனர். அப்போது, அந்த வழியாக வந்த டேங்கர் லாரி கட்டுப்பாட்டை இழந்து சாலை ஓரமாக நின்ற 3 பேர் மீதும் மோதி விபத்து ஏற்பட்டது.

இந்த விபத்தில் 3 பேரும் படுகாயமடைந்தனர். இதனை கண்ட அக்கம் பக்கத்தினர் விபத்தில் சிக்கிய 3 பேரை மீ்ட்டு ஆஸ்பத்திரிக்கு அனுப்பி வைத்தனர்.

சிறுமி, சிறுவன் பலி

அங்கு சிறுமி ஸ்ரீஸ்டி, சிறுவன் ரிஷி குப்தா ஆகிய 2 பேர் வரும் வழியிலேயே உயிரிழந்தாக டாக்டர் தெரிவித்தனர். தாய் ரஞ்சனாவிற்கு காலில் பலத்த காயமடைந்ததால் தீவிர சிகிச்சை அளிக்கப்பட்டு வருகிறது. தகவல் அறிந்த போலீசார் அங்கு சென்று 2 பேரின் உடல்களை மீட்டு பிரேத பரிசோதனைக்கு அனுப்பி வைத்தனர்.

இது குறித்து போலீசார் வழக்கு பதிவு செய்து டேங்கர் லாரி டிரைவர் ராஜேந்திரா புரோகித் என்பவரை கைது செய்து விசாரணை நடத்தி வருகின்றனர்.