வாலிபர் கொலையில் 7 ஆண்டாக தலைமறைவாக இருந்த முக்கிய குற்றவாளி கைது

வசாய்,

பால்கர் மாவட்டத்தை சேர்ந்தவர் சுபாஷ் சந்திரா (வயது21). இவர் கடந்த 2016-ம் ஆண்டு மார்ச் மாதம் மோட்டார் சைக்கிளில் சென்ற போது 4 பேர் கொண்ட கும்பல் அவரை வழிமறித்து தாக்கியது. பின்னர் அவரை கழுத்தை நெரித்து கொலை செய்துவிட்டு, அவரது நகைகள், மோட்டார் சைக்கிளை திருடினர். பின்னர் அவரது உடலை பிளாஸ்டிக் பையில் போட்டு காட்டில் வீசிவிட்டு தப்பிச்சென்றனர். இது குறித்து போலீசார் வழக்கு பதிவு செய்து விசாரணை நடத்தி ஏற்கனவே 3 பேரை கைது செய்தனர். கொலை வழக்கில் முக்கிய குற்றவாளியான சிவ் பையா(28) என்பவர் தலைமறைவாக இருப்பதாக தெரியவந்தது. இவரது உடலில் பச்சை குத்தப்பட்டு இருந்த அடையாளத்தை வைத்து விசாரித்தனர். அப்போது அவர் உத்தரபிரதேச மாநிலம் சித்ரகூட் சில்லிமால் ராஜாபூர் பகுதியில் பதுங்கி இருப்பதாக தகவல் கிடைத்தது. இதனை தொடர்ந்து போலீசார் அங்கு சென்று சிவ்பையாவை கைது செய்தனர். கொலை வழக்கில் கடந்த 7 ஆண்டாக தலைமறைவாக இருந்த முக்கிய குற்றவாளி போலீசில் சிக்கி உள்ளார் என்பது குறிப்பிடத்தக்கது.