‘கூலிங் கிளாஸ்’ வாங்கும்போது..


‘கூலிங் கிளாஸ்’ வாங்கும்போது..
x
தினத்தந்தி 26 May 2019 7:06 AM GMT (Updated: 26 May 2019 7:06 AM GMT)

கூலிங் கிளாஸ் கண்ணாடியை ஸ்டைலுக்காக சிலர் அணிகிறார்கள். ஆனால் கண் சார்ந்த நோய் பாதிப்புகளை தடுப்பதில் கூலிங் கிளாஸுக்கு முக்கிய பங்கு இருக்கிறது.

கூலிங் கிளாஸ் கண்ணாடியை ஸ்டைலுக்காக சிலர் அணிகிறார்கள். ஆனால் கண் சார்ந்த நோய் பாதிப்புகளை தடுப்பதில் கூலிங் கிளாஸுக்கு முக்கிய பங்கு இருக்கிறது. பாதுகாப்பாக வாகனம் ஓட்டவும், சூரிய கதிர் வீச்சுகளில் இருந்து கண்களை பாதுகாக்கவும், கண் கூசுவதை தவிர்க்கவும் கூலிங் கிளாஸ் அணிவது நல்லது. அது கண்களை பாதுகாக்க உதவும்.

தற்போது கூலிங் கிளாஸ்கள் பல வண்ணங்கள், ஸ்டைல்கள் கொண்ட பிரேம்கள், லென்ஸ்கள் என பல அம்சங்களில் கிடைக்கிறது. தரமான, கண்களுக்கு பாதுகாப்பு அளிக்கும் தன்மை கொண்ட கண்ணாடிகளை தேர்ந்தெடுத்து வாங்க வேண்டும். முக்கியமாக புற ஊதா கதிர்வீச்சுகளில் இருந்து கண்களை பாதுகாக்கும் தன்மை கொண்டதாக இருக்கவேண்டும். அவை கண்புரை போன்ற நோய் பாதிப்புகளில் இருந்து தற்காத்துக்கொள்ள உதவும். புற ஊதா கதிர்வீச்சுகளில் இருந்து பாதுகாக்கும் அம்சங்கள் எதுவும் இல்லாமல் ஸ்டைலுக்காக கண்ணாடி வாங்கி அணிவது பயனற்றது. கார் ஓட்டும்போது கண் கூசும் பிரச்சினை ஏற்பட்டாலோ, கடற்கரை போன்ற நீர்நிலைகளுக்கு செல்லும்போது கண்கள் கூசும் பிரச்சினையை எதிர்கொண்டாலோ ‘போலரைஸ்டு லென்ஸ்’ கொண்ட கண்ணாடியை அணியலாம்.

பிரதிபலிக்கும் தன்மை கொண்ட ‘மிரர் சன்கிளாஸ்’ அணிவது பார்க்க அழகாக இருக்கும். கண்களுக்கு குளிர்ச்சியையும் கொடுக்கும். இந்த கண்ணாடி குறிப்பிட்ட அளவு கொண்ட வெளிச்சத்தை மட்டுமே ஊடுருவ செய்து கண்களுக்கு பாதுகாப்பு கொடுக்கும். இரவு நேரத்தில் கார் ஓட்டுபவர்கள், கம்ப்யூட்டர் முன்பு அமர்ந்து வேலை செய்பவர்கள் எதிர் பிரதிபலிப்பு தன்மைகொண்ட ‘அன்டி ரிப்ளெக்டிவ் கோட்டிங்’ கொண்ட கூலிங் கிளாசை அணியலாம். அது கண்களுக்கு பாதுகாப்பு அளிக்கும். இதில் லென்சின் உள் மற்றும் வெளிப்புற பகுதியில் கூடுதலாக கோட்டிங் இடம்பெறுவதால் கண் கூசும் பிரச்சினையும் எழாது.

விலை குறைவாக இருக்கிறது என்பதற்காக தரமில்லாத கண்ணாடிகளை வாங்கக்கூடாது. அது கண்களுக்கு அசவுகரியங்களை ஏற்படுத்தும். கோடை காலத்தில் வெளியில் செல்லும்போது கூலிங் கிளாஸ் அணிந்து செல்வது புற ஊதாக்கதிர் வீச்சு பாதிப்பில் இருந்து கண்களை பாதுகாக்க உதவும்.

Next Story