தினம் ஒரு தகவல் : பிளாஸ்டிக்கை உண்ணும் பாக்டீரியா

ஜப்பானில் உள்ள பெட்பாட்டில் மறுசுழற்சி ஆலையில், பிரிட்டனின் போர்ட் ஸவதுத் பல்கலைக்கழகமும், அமெரிக்காவின் தேசிய புதுப்பிக்கத்தக்க ஆற்றல் துறையினரும் இணைந்து ஆய்வு மேற்கொண்டிருந்தனர். 

அப்போது ‘இதேவனெல்லா சக்கையென்சிஸ்’ என்ற புதிய பாக்டீரியா ஒன்று பெட் பாட்டில் தயாரிக்க பயன்படும் பாலியெத்திலீன் தெரதலே என்ற பிளாஸ்டிக்கை உண்டு வாழ்வதை கண்டு விஞ்ஞானிகள் பிரமித்தனர்.

பெட்வேஸ் என்ற நொதியே பிளாஸ்டிக் செரிக்க காரணமாக இருப்பதையும் கண்டறிந்துள்ளனர். அதன் வேதி அமைப்பில் விஞ்ஞானிகள் சிறு மாற்றம் செய்தபோது, நொதியில் பிளாஸ்டிக் செரிக்கும் திறன் வேகமெடுத்துள்ளது. 

இது பற்றி பேசிய ஆராய்ச்சியாளர்கள் சில அமினோ அமிலங்களை கலப்பதன் மூலம் நொதியின் செயல்பாடு குறையும் என்று தான் கணித்ததாகவும், ஆனால் நொதியின் பிளாஸ்டிக் செரிக்கும் திறன் மேலும் அதிகரித்ததை கண்டு ஆச்சரியமடைந்ததாகவும் கூறினர். இதனை மேலும் மேம்படுத்த அடுத்த கட்ட முயற்சி தொடரும் என்றனர்.

சிதைவதற்கு 100 ஆண்டுகளுக்கு மேல் ஆகும் பிளாஸ்டிக்கை இந்த நொதி வெறும் 45 நாட்களில் சிதைத்து விஞ்ஞானிகளை வியப்பில் ஆழ்த்தியுள்ளது. தொழில்நுட்பத்தின் மூலம் புதிய நொதியின் பிளாஸ்டிக் செரிப்பு திறனை மேம்படுத்தும் முயற்சியில் விஞ்ஞானிகள் இறங்கியுள்ளனர்.

ஆண்டிற்கு 80 லட்சம் டன் அளவிற்கு கடலில் பிளாஸ்டிக் கழிவுகள் கொட்டப்படுகின்றன. இந்த கழிவுகளால் சிறிய கடல்வாழ் உயிரினங்கள் மட்டுமின்றி சுறா மீன், டால்பின் போன்ற பெரிய உயிரினங்களும் செத்து மடிகின்றன. இந்த சூழலில் பிளாஸ்டிக் என்னும் எமனை அழிக்க புதிய என்சைம் கண்டறியப்பட்டுள்ளது, பிளாஸ்டிக் மறுசுழற்சிக்கான கதவுகளை திறக்கச் செய்துள்ளது.