உள்நாட்டில், அக்டோபர் மாதத்தில் மோட்டார் வாகனங்கள் விற்பனை 13% சரிவடைந்தது

புதுடெல்லி

கடந்த பல மாதங்களாகவே மோட்டார் வாகனங் கள் விற்பனை தொடர்ந்து சரிவடைந்து வருகிறது. கடந்த செப்டம்பர் மாதத்தில் கார், பைக் உள்ளிட்ட அனைத்து வகையான மோட்டார் வாகனங்களின் விற்பனை, ஒட்டுமொத்த அளவில் 22 சதவீதத்திற்கு மேல் குறைந்து 20,04,932-ஆக இருந்தது.

அக்டோபர் மாதத்தில் பயணிகள் வாகனங்கள், இரு சக்கர மற்றும் மூன்று சக்கர வாகனங்கள் மற்றும் வர்த்தக வாகனங்கள் உள்ளிட்ட அனைத்து மோட்டார் வாகனங்களின் விற்பனை, ஒட்டுமொத்த அளவில் 21,76,136-ஆக உள்ளது. கடந்த ஆண்டின் இதே மாதத்தில் அது 24,94,345-ஆக இருந்தது. ஆக, விற்பனை ஏறக்குறைய 13 சதவீதம் குறைந்துள்ளது.

அக்டோபர் மாதத்தில் 2,85,027 பயணிகள் வாகனங்கள் விற்பனை ஆகி இருந்தது. சென்ற ஆண்டின் இதே மாதத்தில் அது 2,84,223-ஆக இருந்தது. ஆக, விற்பனை 0.28 சதவீதம் மட்டும் உயர்ந்து இருக்கிறது. வர்த்தக வாகனங்கள் விற்பனை 23 சதவீதம் சரிவடைந்து (87,067-ல் இருந்து) 66,773-ஆக குறைந்துள்ளது. இரு சக்கர வாகனங்கள் விற்பனை 14 சதவீதம் குறைந்து (20,53,497-ல் இருந்து) 17,57,264-ஆக சரிவடைந்து இருக்கிறது. மூன்று சக்கர வாகனங்கள் விற்பனை 3.60 சதவீதம் சரிந்து (69,483-ல் இருந்து) 66,985-ஆக குறைந்துள்ளது.

இவ்வாறு சியாம் புள்ளிவிவரங்கள் கூறுகின்றன.

விற்பனை சரிவால் வாகனத்துறையைச் சேர்ந்த நிறுவனங்கள் உற்பத்தி குறைப்பில் ஈடுபட்டு வருகின்றன. உதாரணமாக அக்டோபர் மாதத்தில் மாருதி நிறுவனம் மொத்தம் 1,19,337 வாகனங்களை மட்டுமே தயாரித்துள்ளது. சென்ற ஆண்டின் இதே மாதத்தில் அது 1,50,497-ஆக இருந்தது. ஆக உற்பத்தி சுமார் 21 சதவீதம் குறைந்துள்ளது. மேலும் தொடர்ந்து ஒன்பதாவது மாதமாக அதன் உற்பத்தி குறைக்கப்பட்டு இருக்கிறது என்பது குறிப்பிடத்தக்கது.