தினம் ஒரு தகவல் : தண்ணீரை மிச்சமாக்க...

தினசரி காலையில் பல் துலக்கும்போது குழாயை திறந்து வைத்துக்கொண்டே, பல் துலக்குகிறோமா என்பதை கவனிக்க வேண்டும். நம்மில் பெரும்பாலானோர், குறிப்பாக நகரங்களில் வசிப்போர் பல் துலக்கும்போதும், முகச்சவரம் செய்யும்போதும் குழாயை மூடுவதில்லை. ஒருவர் இப்படிச் செய்வதால் மட்டும் 3 லிட்டர் தண்ணீர் வீணாகிறது. உண்மையில் இந்தச் செயல்களுக்கு ஒரு கப் தண்ணீரே போதுமானது. ஷவரில் குளித்தால் அதிக நேரம் எடுத்துக் கொள்கிறோம். இதனால் தண்ணீர் வீணாகிறது. வாளியில் குளித்தால் அதைவிட குறைந்த தண்ணீரே செலவழியும்.

பழுதடைந்த குழாய்கள், பைப்புகளாலும் தண்ணீர் வீணாகும். எடுத்துக்காட்டாக, ஒரு குழாயில் இருந்து 30 சொட்டு தண்ணீர் ஒரு நிமிடத்துக்கு வெளியேறினால், ஒரு நாளைக்கு பல லிட்டர் தண்ணீர் வீணாகும். எனவே, வீட்டிலும் அலுவலகத்திலும் குழாய் பழுதடைந்து இருந்தால் உடனே அவற்றை சரிசெய்ய வேண்டும். கழிப்பறையில் உள்ள பிளஷில் இருந்தும் தண்ணீர் கசிந்து வீணாகும்.

இதை அறிய பேனாமையை கரைத்து விட்டால் தெரியும். காய்கறி, அரிசி போன்றவற்றை கழுவிய நீரை செடிகளுக்கு ஊற்றலாம். பாத்திரங்களைக் கழுவும்போது குழாயை திறந்து விட்டுக் கொண்டே கழுவுவதைவிட, ஒரு பெரிய பாத்திரத்தில் மற்ற பாத்திரங்களை தேய்த்து வைத்துக் கொண்டு, மற்றொரு பாத்திரத்தில் நிரப்பப்பட்ட நல்ல நீரில் இரண்டொரு முறை முக்கி எடுத்தால் தண்ணீர் தேவையின்றி விரயம் ஆகாது.

இதையெல்லாம் செய்தாலே சாக்கடை குறைந்து சுற்றுச்சூழல் சீரடையும். வீடுதோறும் தண்ணீர் பெருமளவு மிச்சமாகும் என்கிறார்கள் சுற்றுச்சூழல் ஆர்வலர்கள்.