<
இரண்டாவது நாளாக முன்னேற்றம்: சென்செக்ஸ் 227 புள்ளிகள் உயர்வு; நிப்டி 68 புள்ளிகள் அதிகரிப்பு
வாரத்தின் இறுதி வர்த்தக தினமான வெள்ளிக்கிழமை அன்று பங்கு வர்த்தகம் இரண்டாவது நாளாக முன்னேற்றம் கண்டது. மும்பை பங்குச்சந்தை குறியீட்டு எண் சென்செக்ஸ் 227 புள்ளிகள் ஏற்றம் கண்டது. தேசிய பங்குச்சந்தை குறியீட்டு எண் நிப்டி 68 புள்ளிகள் முன்னேறியது.
இக்கனாமிக் டைம்ஸ் செய்தி பிரிவு
மும்பை
நிதி நிலை முடிவுகள்
பல முன்னணி நிறுவனங்களின் நிதி நிலை முடிவுகள் சிறப்பாக இருந்ததால் முதலீட்டாளர்கள் உற்சாகத்துடன் பங்கு வர்த்தகத்தில் ஈடுபட்டனர். அன்னிய முதலீடு போன்ற வெளி நிலவரங்களும் சாதகமாக இருந்தது. பிற நாடுகளிலும் பங்கு வியாபாரம் திருப்திகரமாக இருந்தால் இங்கும் சந்தைகள் ஏற்றம் கண்டன.
அந்த நிலையில், மும்பை பங்குச் சந்தையில் பொறியியல் சாதனங்கள் துறை குறியீட்டு எண் அதிகபட்சமாக 1.50 சதவீதம் உயர்ந்தது. அடுத்து நுகர்வோர் சாதனங்கள் துறை குறியீட்டு எண் 1.33 சதவீதம் அதிகரித்தது. சென்செக்ஸ் கணக்கிட உதவும் 30 நிறுவனப் பங்குகளில் 22 நிறுவனப் பங்குகளின் விலை அதிகரித்தது. 8 நிறுவனப் பங்குகளின் விலை சரிந்தது.
இந்தப் பட்டியலில் அல்ட்ராடெக் சிமெண்ட், டெக் மகிந்திரா, எல் அண்டு டி, ஆக்சிஸ் வங்கி, கோட்டக் மகிந்திரா வங்கி, டைட்டான், எச்.சி.எல். டெக்னாலஜிஸ் உள்ளிட்ட 22 நிறுவனப் பங்குகளின் விலை உயர்ந்தது. அதே சமயம் பவர் கிரிட், இண்டஸ் இந்த் பேங்க், சன் பார்மா, டி.சி.எஸ்., ரிலையன்ஸ் இண்டஸ்ட்ரீஸ் உள்பட 8 நிறுவனப் பங்குகளின் விலை குறைந்தது.
சென்செக்ஸ்
மும்பை பங்குச்சந்தையில், வர்த்தகத்தின் இறுதியில் சென்செக்ஸ் 226.79 புள்ளிகள் அதிகரித்து 41,613.19 புள்ளிகளில் நிலைகொண்டது. வர்த்தகத்தின் இடையே அதிகபட்சமாக 41,697.03 புள்ளிகளுக்கும், குறைந்தபட்சமாக 41,275.60 புள்ளிகளுக்கும் சென்றது.
இந்தச் சந்தையில் 1390 நிறுவனப் பங்குகளின் விலை உயர்ந்தும், 1140 நிறுவனப் பங்குகளின் விலை சரிந்தும் இருந்தது. 172 நிறுவனப் பங்குகளின் விலையில் மாற்றம் இல்லை. நேற்று மொத்த வர்த்தகம் ரூ.2,068 கோடியாக குறைந்தது. கடந்த வியாழக்கிழமை அன்று அது ரூ.2,465 கோடியாக இருந்தது.
தேசிய பங்குச்சந்தை
தேசிய பங்குச்சந்தையில், வர்த்தகத்தின் இறுதியில் நிப்டி 67.90 புள்ளிகள் ஏற்றம் கண்டு 12,248.25 புள்ளிகளில் முடிவுற்றது. வர்த்தகத்தின் இடையே அதிகபட்சமாக 12,272.15 புள்ளிகளுக்கும், குறைந்தபட்சமாக 12,149.65 புள்ளிகளுக்கும் சென்றது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
