மூன்றாவது காலாண்டில் டாட்டா ஸ்டீல் இழப்பு ரூ.1,229 கோடி

மும்பை

டாட்டா ஸ்டீல் நிறுவனம், நடப்பு நிதி ஆண்டின் மூன்றாவது காலாண்டில் (2019 அக்டோபர்-டிசம்பர்) ரூ.1,229 கோடியை ஒட்டுமொத்த நிகர இழப்பாகக் கண்டுள்ளது. கடந்த நிதி ஆண்டின் இதே காலாண்டில் இந்நிறுவனம் ரூ.1,753 கோடி லாபம் ஈட்டி இருந்தது. இதே காலத்தில் இந்நிறுவனத்தின் செயல்பாட்டு வருவாய் 9 சதவீதம் சரிவடைந்து ரூ.35,520 கோடியாக இருக்கிறது. ஒட்டுமொத்த லாபம் 46 சதவீதம் சரிந்து (ரூ.6,726 கோடியில் இருந்து) ரூ.3,659 கோடியாக குறைந்துள்ளது.

மும்பை பங்குச்சந்தையில், செவ்வாய்க்கிழமை அன்று வர்த்தகம் தொடங்கியபோது டாட்டா ஸ்டீல் பங்கு ரூ.446.25-க்கு கைமாறியது. வர்த்தகத்தின் இடையே அதிகபட்சமாக ரூ.457.15-க்கும், குறைந்தபட்சமாக ரூ.442.85-க்கும் சென்ற இப்பங்கு இறுதியில் ரூ.444.25-ல் நிலைகொண்டது. இது, திங்கள்கிழமை இறுதி நிலவரத்துடன் ஒப்பிடும்போது 0.14 சதவீத ஏற்றமாகும்.