அரசு பஸ்சை வழிமறித்து டிரைவரிடம் தகராறு

தஞ்சை மாவட்டம் ஒரத்தநாடு அருகே உள்ள பாச்சூர் கிராமத்தை சேர்ந்தவர் ராஜாராம் (வயது 33). இவர் தஞ்சையில் இருந்து மருங்குளம் வழியாக ஒரத்தநாட்டிற்கு செல்லும் அரசு பஸ்சில் டிரைவராக பணியாற்றி வருகிறார். சம்பவத்தன்று இவர் வழக்கம்போல் பஸ்சை ஓட்டி சென்றார். ஈச்சங்கோட்டை மில் அருகே சென்றபோது வடக்கூர் கிராமத்தை சேர்ந்த விக்னேஷ், பிரதீபன் (வயது26), கரிகாலன் என்கிற சூர்யா (27) ஆகிய 3 பேரும் பஸ்சை வழிமறித்து டிரைவர் ராஜாராமை தகாத வார்த்தைகளால் திட்டி கொலை மிரட்டல் விடுத்து தகராறில் ஈடுபட்டனர். இதுகுறித்து அரசு பஸ் டிரைவர் ராஜாராம் கொடுத்த புகாரின் பேரில் ஒரத்தநாடு போலீசார் வழக்குப்பதிவு செய்து பிரதீபன், சூர்யா ஆகிய 2 பேரையும் கைது செய்தனர். மேலும் இந்த வழக்கில் தொடர்புடைய விக்னேசை தேடி வருகின்றனர்.