முதியவர்கள் 2 பேர் சாவு

வெவ்வேறு விபத்துகளில் முதியவர்கள் 2 பேர் இறந்தனர்.

ஆட்ேடா மோதியது

துறையூர் விநாயகர் தெருவை சேர்ந்தவர் சிவலிங்கம் (வயது 70). இவர் கடந்த 21-ந்தேதி துறையூரில் உள்ள தியாகி சிங்காரவேலர் தெரு சாலை வழியாக நடந்து சென்றார். அப்போது, அந்த வழியாக வந்த ஆட்டோ சிவலிங்கம் மீது மோதியது. இதில் பலத்த காயம் அடைந்த அவரை அக்கம்பக்கத்தினர் மீட்டு துறையூர் அரசு மருத்துவமனையில் சிகிச்சைக்காக சேர்த்தனர். பின்னர் மேல் சிகிச்சைக்காக திருச்சி அரசு மருத்துவமனையில் சேர்க்கப்பட்ட அவர் நேற்று சிகிச்சை பலன் இன்றி இறந்தார். இது குறித்த புகாரின் பேரில் துறையூர் போலீசார் வழக்குப்பதிவு செய்து விசாரணை நடத்தி வருகின்றனர்.

மற்றொரு விபத்து

தா.பேட்டையை அடுத்த கண்ணனூர் முருகன் கோவில் தெருவை சேர்ந்தவர் நடராஜன் (86). கூலி தொழிலாளி. நேற்று இவர் கண்ணனூர் - பகளவாடி செல்லும் சாலையில் தனது வீட்டின் அருகே சாலையோரத்தில் நின்று கொண்டிருந்தார். அப்போது, அந்த வழியாக வந்த வாகனம் அவர் மீது மோதிவிட்டு நிற்காமல் சென்றது. இதில் படுகாயம் அடைந்த நடராஜனை அப்பகுதியினர் மீட்டு துறையூர் அரசு மருத்துவமனையில் சிகிச்சைக்காக சேர்த்தனர். பின்னர் மேல் சிகிச்சைக்காக திருச்சி அரசு மருத்துவமனைக்கு கொண்டு செல்லும் வழியில் நடராஜன் பரிதாபமாக உயிரிழந்தார்.

இது குறித்த புகாரின் பேரில் ஜெம்புநாதபுரம் போலீஸ் சப்-இன்ஸ்பெக்டர் வீரமணிகண்டன் வழக்குப்பதிவு செய்து விபத்து ஏற்படுத்தி விட்டு நிற்காமல் சென்ற வாகனம் குறித்து தீவிர விசாரணை மேற்கொண்டு வருகிறார்.