வெவ்வேறு சாலை விபத்தில் 2 பேர் பலி

வேலூர் சலவன்பேட்டையை சேர்ந்தவர் சிவா (வயது 40). லாரி கிளீனர். இவர் நேற்று மாலை சேண்பாக்கம் பகுதியில் தேசிய நெடுஞ்சாலை கடந்த போது அந்த வழியாக சென்ற கார் அவர் மீது மோதியது. அதில் அவர் சம்பவ இடத்திலேயே பலியானார். அவரது உடலை வேலூர் வடக்கு போலீசார் கைப்பற்றி அடுக்கம்பாறை அரசு மருத்துவமனைக்கு பிரேத பரிசோதனைக்காக அனுப்பி வைத்தனர்.

இதேபோல கருகம்புத்தூரை சேர்ந்தவர் விஜயகுமார் (30). இவர் மோட்டார்சைக்கிளில் நேற்று மாலை வீட்டுக்கு சென்று கொண்டிருந்தார். அப்போது எதிர்பாராத விதமாக சாலை தடுப்பில் அவர் மோதியதாக கூறப்படுகிறது. அதில் பலத்த காயம் அடைந்த அவர் சம்பவ இடத்திலேயே உயிரிழந்தார். அவரது உடலை வடக்கு போலீசார் கைப்பற்றி அடுக்கம்பாறை அரசு மருத்துவமனைக்கு அனுப்பி வைத்தனர்.

இந்த சம்பவங்கள் குறித்து போலீசார் விசாரணை நடத்தி வருகின்றனர்.