வெவ்வேறு விபத்துகளில் 2 பேர் சாவு

வெவ்வேறு விபத்துகளில் 2 பேர் இறந்தனர்.

மோட்டார் சைக்கிள் விபத்து

காட்டுப்புத்தூர் அருகே உள்ள நத்தம் மூங்கில்துறை பகுதியை சேர்ந்தவர் கோவிந்தன் (வயது 56). இவர் கடந்த 7-ந்தேதி மோட்டார் சைக்கிளில் சென்று கொண்டிருந்தார். இதனிடையே காட்டுப்புத்தூர் அருகே உள்ள காடுவெட்டி மேலவழிக்காடு கிராமத்தை சேர்ந்த சரவணன் (43) என்பவர் நடந்து சென்றார்.

அப்போது, சரவணன் மீது மோட்டார் சைக்கிள் மோதியதில் இருவரும் கீழே விழுந்தனர். இதில் தலையில் பலத்த காயமடைந்த கோவிந்தன் திருச்சி அரசு மருத்துவமனையில் சிகிச்சைக்காக சேர்க்கப்பட்டார். அங்குஅவர் சிகிச்சை பலன் இன்றி இறந்தார். இந்த விபத்தில் சரவணன் லேசான காயத்துடன் உயிர்தப்பினார். இது குறித்து காட்டுப்புத்தூர் போலீசார் வழக்குப்பதிவு செய்து விசாரணை நடத்தி வருகின்றனர்.

மற்றொரு விபத்து

திருச்சி எடைமலைப்பட்டிபுதூர் அண்ணாநகர் பகுதியை சேர்ந்தவர் சரவணன். இவரது மகன் வினிஸ்குமார் (26). இவர் பெயிண்டிங் வேலை செய்து வந்தார். இவர் சம்பவத்தன்று மதுரை- திருச்சி பைபாஸ் ரோடு மன்னார்புரம் ராணுவ மைதானம் அருகே நடத்து சென்றுகொண்டிருந்தார்.

அப்போது அந்த வழியாக வந்த அடையாளம் தெரியாத வாகனம் வினிஸ்குமார் மீது மோதிவிட்டு நிற்காமல் சென்றது. இதில் அவர் பலத்த காயம் அடைந்தார். உடனே அக்கம் பக்கத்தினர் அவரை மீட்டு திருச்சி அரசு மருத்துவமனையில் சிகிச்சைக்காக சேர்த்தனர். அங்கு சிகிச்சை பலனின்றி அவர் இறந்தார். இது குறித்து தெற்கு போக்குவரத்து புலனாய்வு பிரிவு போலீசார் வழக்குப்பதிவு செய்து விசாரணை நடத்தி வருகின்றனர்.