மூதாட்டியிடம் செயின் பறித்த 2 வாலிபர்கள் கைது

ஆம்பூரை அடுத்த சாணாங்குப்பம் பகுதியை சேர்ந்தவர் அண்ணாமலை மனைவி கிருஷ்ணவேணி (வயது 68). இவர் நேற்று முன்தினம் மாலை மாரப்பட்டு பகுதியில் இருக்கும் தனது மகள் வீட்டுக்கு சென்று விட்டு, பின்னர் வீடு திரும்பி கொண்டிருந்தார். அப்போது ஆம்பூர் பகுதியைச் சேர்ந்த சதீஷ் (வயது 24) மற்றும் ராகுல் (வயது 23) ஆகியோர் கிருஷ்ணவேணி அணிந்திருந்த சுமார் 1¾ பவுன் செயினை பறித்துக் கொண்டு தப்பி சென்றனர்.

இது குறித்து கிருஷ்ணவேணி ஆம்பூர் டவுன் போலீஸ் நிலையத்தில் புகார் அளித்தார். அதன்பேரில் கண்காணிப்பு கேமரா காட்சிகள் அடிப்படையில் தீவிர விசாரணை நடத்திய போலீசார் 24 மணி நேரத்திற்குள் சதீஷ் மற்றும் ராகுலை நேற்று கைது செய்து, அவர்களிடமிருந்த 1¾ பவுன் செயினை மீட்டு, விசாரணை நடத்தி வருகின்றனர்.