சசிகலா உறவினர் வீடுகளில் வருமான வரி சோதனை 4-வது நாளாக நீடிப்பு சொத்து ஆவணங்களை மதிப்பிடும் பணி தீவிரம்

சென்னை,

வருமான வரித்துறை “ஆபரேஷன் கிளன் மணி” என்ற பெயரில், வரி ஏய்ப்பு செய்யும் நிறுவனங்கள் மீது நடவடிக்கை எடுக்கும் பணியை தொடங்கி இருக்கிறது.

அந்த வகையில் தமிழ்நாட்டில் சென்னை, தஞ்சை, திருச்சி, நாமக்கல் கோவை, கோடநாடு உள்ளிட்ட இடங்களிலும் மற்றும் பெங்களூரு, ஐதராபாத், டெல்லி, புதுச் சேரியிலும் கடந்த 9-ந் தேதி வருமான வரித்துறை அதிகாரிகள் அதிரடியாக சோதனை மேற்கொண்டனர். சசிகலாவின் உறவினர்கள் மற்றும் அவர்களுடன் தொடர்பு உடையவர்களின் 187 இடங்களில் சுமார் 1,600 அதிகாரிகள் ஈடுபட்டனர்.

சசிகலா, டி.டி.வி.தினகரன், திவாகரன், நடராஜன், இளவரசியின் மகன் விவேக் மற்றும் அவருடைய ஆதரவாளர்கள் ஆகியோரின் நிறுவனங்கள், அலுவலகங்கள், வீடுகள் ஆகியவற்றில் தொடங்கிய இந்த சோதனை இடைவிடாமல் நேற்று 4-வது நாளாக நீடித்தது.

இவ்வாறு பல்வேறு இடங்களிலும் நடைபெற்ற சோதனையில் ஏராளமான சொத்து ஆவணங்களை வருமான வரி அதிகாரிகள் கைப்பற்றி உள்ளனர். அந்த ஆவணங்களை அவர்கள் சென்னையில் உள்ள வருமான வரி அலுவலகத்துக்கு எடுத்து வந்து உள்ளனர். தணிக்கை அதிகாரிகளின் உதவியுடன் அந்த ஆவணங்களை மதிப்பிடும் பணியில் வருமான வரி அதிகாரிகள் தீவிரமாக ஈடுபட்டு உள்ளனர். மேலும் கைப்பற்றப்பட்ட தங்கம், வைர நகைகள் உள்ளிட்டவற்றை மதிப்பிடும் பணியும் நடைபெற்று வருகிறது.

இதுபற்றி வருமான வரி அதிகாரி ஒருவரிடம் கேட்டபோது, கடந்த 4 நாட்களாக நடைபெற்று வந்த வருமான வரி சோதனை கிட்டத்தட்ட முடிந்துவிட்டதாகவும், ஆவணங்களை மதிப்பிடும் பணி நடந்து வருவதாகவும், அடுத்த கட்டமாக சம்பந்தப்பட்டவர் களை நேரில் அழைத்து விசாரணை நடத்த தீர்மானித்து இருப்பதாகவும் கூறினார்.

என்னென்ன ஆவணங்கள் கைப்பற்றப்பட்டு உள்ளன என்ற தகவலை தெரிவிக்க மறுத்த அவர், பெருமளவில் வரி ஏய்ப்பு மோசடி நடந்து இருப்பதாக சோதனையில் தெரியவந்து இருப்பதாகவும் தெரிவித்தார்.