விஷூ திருநாள்: மலையாள மொழி பேசும் மக்களுக்கு எடப்பாடி பழனிசாமி வாழ்த்து

சென்னை, 

மலையாள மொழி பேசும் மக்களுக்கு முதல்-அமைச்சர் எடப்பாடி பழனிசாமி விஷூ தின வாழ்த்து தெரிவித்துள்ளார். அதில், வசந்தத்தையும், அன்பையும் வழங்கும் ஆண்டாக மலரட்டும் என்று கூறியுள்ளார்.

தமிழ்நாடு முதல்-அமைச்சர் எடப்பாடி பழனிசாமி வெளியிட்டுள்ள விஷூ தின வாழ்த்து செய்தியில் கூறப்பட்டுள்ளதாவது:-

புத்தாண்டு திருநாளாம் “விஷூ” திருநாளை உற்சாகமாக கொண்டாடும் மலையாள மொழி பேசும் மக்கள் அனைவருக்கும் எனது உளமார்ந்த “விஷூ” தினத் திருநாள் நல்வாழ்த்துகளைத் தெரிவித்துக்கொள்கிறேன்.

எவ்விடத்தில் வாழ்ந்தாலும் தங்கள் பாரம்பரியத்தையும், மரபுகளையும் பேணிப் பாதுகாத்து வாழும் மலையாள மொழி பேசும் மக்கள், புத்தாண்டு திருநாளான “விஷூ” திருநாளன்று, அதிகாலை கண் விழித்து அரிசி, காய்கனிகள், கண்ணாடி, கொன்றை மலர்கள், தங்க நாணயங்கள் கொண்டு அலங்கரிக்கப்பட்ட விஷூக்கனி கண்டு, புலரும் இப்புத்தாண்டு அனைத்து நலங்களையும், வளங்களையும் வழங்கும் ஆண்டாக மலர வேண்டும் என்று இறைவனை பக்தியுடன் வழிபட்டு, குடும்பத்தினருடன் அறுசுவை விருந்துண்டு “விஷூ” தினத்தை மகிழ்வுடன் கொண்டாடுவார்கள்.

இப்புத்தாண்டு, மலையாள மொழி பேசும் மக்களின் வாழ்வில் வசந்தத்தையும், அன்பையும் வழங்கும் ஆண்டாக மலரட்டும் என்று வாழ்த்தி, அவர்களுக்கு எனது இனிய “விஷூ” திருநாள் நல்வாழ்த்துகளை மீண்டும் ஒருமுறை உரித்தாக்கிக்கொள்கிறேன்.

இவ்வாறு அதில் கூறப்பட்டுள்ளது.