ரூ.6½ கோடியில் 10 மாவட்டங்களில் விதை சுத்திகரிப்பு - சேமிப்பு கிடங்கு வசதி

சென்னை,

தமிழக சட்டசபையில் நேற்று நடைபெற்ற வேளாண்மைத்துறை மானியக் கோரிக்கை விவாதத்தை தொடர்ந்து, வேளாண்மைத் துறை அமைச்சர் துரைக் கண்ணு புதிய அறிவிப்புகளை வெளியிட்டு பேசினார். அப்போது அவர் கூறியதாவது.

* ‘எம்.ஜி.ஆர். 100’ நெல் ரகம் ரூ.1 கோடியே 19 லட்சம் மதிப்பீட்டில் பிரபலப்படுத்தப்படும்.

* மண்ணின் வளத்தினை மேம்படுத்த 50 ஆயிரம் ஏக்கர் பரப்பில் பசுந்தாள் உரப்பயிர் சாகுபடி செய்ய ரூ.3 கோடி ஒதுக்கீடு செய்யப்படும்.

* இயற்கை விவசாயத்தை ஊக்குவிக்கும் வகையில் வேளாண்மைத் துறை மூலம் தமிழ்நாட்டின் குறிப்பிட்ட பகுதிகளைத் தேர்ந்தெடுத்து, இயற்கை வேளாண் மண்டலமாக அறிவித்து, முற்றிலும் ரசாயனமற்ற இயற்கை வேளாண்மையைப் பரவலாக்க ரூ.5 கோடியே 5 லட்சம் நிதி ஒதுக்கீடு செய்யப்படும்.

* தரமான விதைகளின் தேவைகளை பூர்த்திசெய்வதற்கு 10 மாவட்டங்களில் விதை சுத்திகரிப்பு மற்றும் சேமிப்பு கிடங்கு வசதி 11 உழவர் உற்பத்தியாளர் நிறுவனங்கள் மூலம் ஏற்படுத்த ரூ.6 கோடியே 60 லட்சம் ஒதுக்கீடு செய்யப்படும்.

* பாரம்பரிய நெல் ரகங்களை ஊக்குவிக்கும் பொருட்டு, பாரம்பரிய நெல் ரகங்களை பாதுகாத்து, சாகுபடி செய்து, மாநில அளவில் அதிக மகசூல் பெறும் முதல் 3 விவசாயிகளுக்கு பாரத ரத்னா டாக்டர் எம்.ஜி.ஆர். பாரம்பரிய நெல் பாதுகாவலர் விருதும், ரொக்கமும் வழங்கப்படும்.

* சுற்றுச்சூழலை மேம்படுத்தும் விதமாக, பொது மற்றும் தனியார் நிகழ்ச்சிகளில் பழக்கன்றுகள் பரிசளிப்பதை ஊக்குவிக்கும் வகையில், தோட்டக்கலைத்துறையின் மூலம் தரமான பழ மரக்கன்றுகளும், இதர கன்றுகளும் பொதுமக்களுக்கு நியாயமான விலையில் வழங்கிட ரூ.5 கோடி செலவிடப்படும்.

* விவசாயிகளுக்கு லாபம் தரும் தோட்டக்கலை பயிர்கள் ரூ.34 கோடியே 45 லட்சம் நிதி ஒதுக்கீட்டில், 44,250 ஏக்கரில் பரப்பு விரிவாக்கம் செய்யப்படும்.

* தமிழ்நாட்டில் வெங்காய சாகுபடியை ஊக்குவிக்கவும், குறைந்த செலவில் வெங்காய சேமிப்பு கிடங்குகள் அமைக்கவும், ரூ.7 கோடியே 35 லட்சம் நிதி ஒதுக்கீடு செய்யப்படும்.

* கிராமப்புறங்களில் வேலைவாய்ப்பை அதிகரிக்க, இளைஞர்களுக்கு, வேளாண் எந்திரங்கள், சூரிய சக்தி பம்பு செட்டுகள் மற்றும் நுண்ணீர் பாசன அமைப்புகளை இயக்குதல் மற்றும் பராமரிப்பு தொடர்பான தொழில்நுட்பப் பயிற்சிகள் ரூ.1 கோடியே 39 லட்சம் செலவில் வழங்கப்படும்.

இவ்வாறு அமைச்சர் துரைக்கண்ணு கூறினார்.