உச்சத்தை தொடும் பெட்ரோல்-டீசல் விலை: கலால் வரியை லிட்டருக்கு ரூ.5 குறைக்க வேண்டும் மத்திய அரசுக்கு, டாக்டர் ராமதாஸ் வலியுறுத்தல்

சென்னை,


சவுதி அரேபியாவில் எண்ணெய் ஆலை மீது நடத்தப்பட்ட தாக்குதலை தொடர்ந்து எரிபொருள் விலைகள் மீண்டும் உயர தொடங்கியுள்ளன. கடந்த மாதம் (செப்டம்பர்) 9-ந்தேதியில் இருந்து பெட்ரோல்-டீசல் விலை உயர்ந்து வருகிறது.

அந்தவகையில் கடந்த 20 நாட்களில் பெட்ரோல் விலை லிட்டருக்கு ரூ.2.99-ம், டீசல் விலை ரூ.2.46-ம் உயர்ந்துள்ளன. இனிவரும் நாட்களில் பெட்ரோல்-டீசல் விலை மேலும் உயர்ந்து புதிய உச்சங்களை எட்டும் என தெரிகிறது.

இதனால் காய்கறிகள் உள்ளிட்ட அத்தியாவசியப் பொருட்களின் விலைகளும் உயரத் தொடங்கியிருப்பதால் மக்களின் துயரங்கள் சொல்ல முடியாத அளவுக்கு அதிகரித்திருக்கின்றன. பெட்ரோல்-டீசல் விலையை குறைக்க மத்திய அரசு எந்த நடவடிக்கையும் எடுக்காதது வருத்தம் அளிக்கிறது.

கடந்த 2008-09-ம் ஆண்டில் பொருளாதார மந்த நிலை ஏற்பட்டபோது அதை சமாளிக்க பெட்ரோல்-டீசல் மீதான கலால் வரி முற்றிலுமாக ரத்து செய்யப்பட்டது. ஆனால், இப்போது பெருநிறுவனங்கள் மீதான வரி ரூ.1½ லட்சம் கோடி அளவுக்கு குறைக்கப்பட்ட நிலையில், பெட்ரோல்-டீசல் மீதான வரி ஒரு பைசா கூட குறைக்கப்படவில்லை. இது நியாயமல்ல.

எனவே, அடித்தட்டு மக்களின் சுமையை ஓரளவாவது கட்டுப்படுத்தும் வகையில், பெட்ரோல்-டீசல் மீதான கலால் வரியை லிட்டருக்கு குறைந்தது ரூ.5 குறைக்க மத்திய அரசு முன்வர வேண்டும். இவ்வாறு அவர் கூறியுள்ளார்.