மாநில செய்திகள்

70 ஆயிரம் பேருக்கு வேலை வாய்ப்பு: சென்னையில் ரூ.5 ஆயிரம் கோடியில் தகவல் தொழில்நுட்ப பூங்கா எடப்பாடி பழனிசாமி அடிக்கல் நாட்டினார் + "||" + IT park in Chennai for Rs 5 thousand crore

70 ஆயிரம் பேருக்கு வேலை வாய்ப்பு: சென்னையில் ரூ.5 ஆயிரம் கோடியில் தகவல் தொழில்நுட்ப பூங்கா எடப்பாடி பழனிசாமி அடிக்கல் நாட்டினார்

70 ஆயிரம் பேருக்கு வேலை வாய்ப்பு:  சென்னையில் ரூ.5 ஆயிரம் கோடியில் தகவல் தொழில்நுட்ப பூங்கா எடப்பாடி பழனிசாமி அடிக்கல் நாட்டினார்
‘சென்னையில் ரூ.5 ஆயிரம் கோடியில் அமைக்கப்படும் தகவல் தொழில்நுட்ப பூங்கா மூலம் 70 ஆயிரம் பேருக்கு வேலைவாய்ப்பு கிடைக்கும்’ என்று அடிக்கல் நாட்டிய பின்னர் முதல்-அமைச்சர் எடப்பாடி பழனிசாமி கூறினார்.
சென்னை,

சென்னை தரமணியில் டிட்கோ மற்றும் டி.எல்.எப் நிறுவனம் இணைந்து ரூ.5 ஆயிரம் கோடி முதலீட்டில் 27 ஏக்கர் பரப்பளவில் தகவல் தொழில்நுட்பம் மற்றும் அதனைச் சார்ந்த பணிகளுக்கான (டவுன் டவுன்) வளாகம் அமைக் கப்படுகிறது. இதில் 20 லட்சத்து 50 ஆயிரம் சதுர அடி பரப்பளவில் கட்டிடம் கட்டப்படுகிறது. இதற்கான அடிக்கல் நாட்டு விழா நேற்று நடந்தது. முதல்-அமைச்சர் எடப்பாடி பழனிசாமி குத்து விளக்கு ஏற்றி வைத்து, அடிக்கல் நாட்டினார்.

நிகழ்ச்சியில் துணை முதல்-அமைச்சர் ஓ.பன்னீர்செல்வம், தொழில் துறை அமைச்சர் எம்.சி.சம்பத், தொழில்துறை முதன்மைச் செயலாளர் நா.முருகானந்தம், டிட்கோ நிறுவனத் தலைவர் மற்றும் மேலாண்மை இயக்குனர் காகர்லா உஷா, டி.எல்.எப். நிறுவனத்தின் தலைமை செயல் அதிகாரி மோகித் குஜ்ரால், நிறுவனத்தின் மேலாண்மை இயக் குனர் ஸ்ரீராம் கட்டார் ஆகியோர் முன்னிலை வகித்தனர்.

தொழில் முதலீடுகள்

விழாவில் முதல்-அமைச்சர் எடப்பாடி பழனிசாமி பேசியதாவது:-

மறைந்த முதல்-அமைச்சர் ஜெயலலிதாவின் அரசு எடுத்து வரும் தொடர் முயற்சிகளால் பல புதிய தொழில் முதலீடுகளை தமிழகம் தொடர்ந்து ஈர்த்து தொழில் துறையில் முன்னணி மாநிலமாக திகழ்ந்து வருகிறது. 2-வது உலக முதலீட்டாளர் மாநாடு நடைபெற்ற ஒரே ஆண்டில் 59 திட்டங்கள் தங்கள் வணிக உற்பத்தியைத் தொடங்கியுள்ளன. 213 திட்டங்கள் பல்வேறு நிலைகளில் செயல்பாட்டில் உள்ளன. அதேபோல், இதுவரை ரூ.19 ஆயிரம் கோடி மதிப்பீட்டில் 63 புரிந்துணர்வு ஒப்பந்தங்கள் போடப் பட்டுள்ளன.

இவற்றின் மூலம் 83 ஆயிரம் வேலை வாய்ப்புகள் புதிதாக உருவாக்கப்பட உள்ளன. தமிழகத்தை உலகளவில் உற்பத்தி மையமாக மாற்றும் தொலைநோக்குடன் நான் செயல்பட்டு வருகிறேன். இந்திய மாநிலங்களில் ஒரு புதிய வளர்ச்சியின் முன்மாதிரியான தமிழகத்தை மாற்றுவதில் எனது அரசு உறுதி பூண்டுள்ளது.

தென் மாவட்டங்கள் வளர்ச்சி

குவைத் நாட்டைச் சார்ந்த அல் கராபி என்ற நிறுவனம் தூத்துக்குடியில் ரூ.49 ஆயிரம் கோடி முதலீட்டில் சுற்றுச்சூழலுக்கு உதந்த பெட்ரோலிய பொருட்களைத் தயாரிக்கும் ஒரு நவீன பெட்ரோலிய சுத்திகரிப்பு ஆலை மற்றும் பெட்ரோ கெமிக்கல் உற்பத்தி தொழிற்சாலையை தொடங்க உள்ளது. இதன் மூலம், சிங்கப்பூர் நாட்டின் ஜூராங்க் தீவு, குஜராத்தில் உள்ள ஜாம் நகர் மற்றும் தஹேஜ் போன்ற பகுதிகளில் ஏற்பட்ட வளர்ச்சியைப் போல, தமிழகத்தின் தென் மாவட்டங்களும் சிறப்பான வளர்ச்சியைப் பெறும். தமிழகத்தில் தொழில் தொடங்க முன் வரும் வெளிநாடு வாழ் தமிழ் மக்களுக்கு ரத்தின கம்பளம் விரித்து வரவேற்கவும், ‘யாதும் ஊரே’ என்ற புதிய திட்டத்தை நானே நேரடியாகச் சென்று அமெரிக்காவில் தொடங்கி வைத்தேன். இந்த பயணத்தில், இங்கிலாந்து, அமெரிக்கா நாடுகளிலும், துபாயிலும் உள்ள தொழில் முதலீட்டாளர்களை சந்தித்து, அதன் மூலம் ரூ.8 ஆயிரத்து 835 கோடி மதிப்பீட்டிலான முதலீடுகளை ஈர்த்து 41 நிறுவனங்களுடன் புரிந்துணர்வு ஒப்பந்தங்கள் கையெழுத்து இடப்பட்டன. இதனால் 35 ஆயிரத்துக்கும் மேற்பட்ட நபர்களுக்கு புதிய வேலை வாய்ப்புகள் உருவாக்கப்பட உள்ளன. இந்த ஒப்பந்தங்களில் 5 நிறுவனங்கள் செயல்பாட்டிற்கு வந்துள்ளன.

இதுவரை ரூ.14 ஆயிரத்து 728 கோடி மதிப்பீட்டிலான 36 தொழில் திட்டங்களுக்கு பல்வேறு அனுமதிகளும் வழங்கப்பட்டுள்ளன. 22 ஆயிரத்து 763 நபர்களுக்கு புதிய வேலைவாய்ப்புகள் விரைவில் உருவாக்கப்பட உள்ளன. முதலீடு செய்வதை எளிதாக்குதல் பிரிவு, எனது அலுவலகத்தில் உருவாக்கப்பட்டுள்ளது. பாதுகாப்பு மற்றும் வானூர்தி தொழில் பூங்கா, மின்சார வாகன பூங்கா ஆகியவை ஏற்படுத்தப்பட உள்ளன. செல்போன் நிறுவனங்கள் மற்றும் பல்வேறு காரணங்களால் கடந்த காலங்களில் நிறுத்தப்பட்ட புதிய நிறுவனங்கள் தற்போது ஆரம்பிக்கும் பணிகளும் நடந்து வருகிறது.

70 ஆயிரம் பேருக்கு வேலை

சென்னை இன்று இந்தியாவின் தகவல் தொழில்நுட்ப தலைநகரம் என்று கூறுகின்ற அளவிற்கு பல புதிய தகவல் தொழில்நுட்ப நிறுவனங்கள் தொடங்கப்பட்டு வருகின்றன. மிகப் பெரிய நிறுவனங்கள் தங்களுடைய கிளைகளை சென்னையில் திறந்துள்ளன. மற்ற நிறுவனங்களும் தங்கள் அலுவலகங்களை சென்னையில் தொடங்க விரும்புகின்றன. எனவே பல்வேறு தகவல் தொழில் நுட்ப நிறுவனங்கள் தங்களுடைய தொழில்நுட்ப அலுவலகங்களை சென்னையில் அமைப்பதற்கு வசதியாக மற்றொரு பெரிய வளாகம் அமைக்கப்பட வேண்டியது மிகவும் அவசியமாகும்.

இதற்கு செயல் வடிவம் கொடுக்கும் வகையில் டிட்கோவும், டி.எல்.எப். நிறுவனமும் கூட்டாக இணைந்து சென்னை, தரமணியில் 27.04 ஏக்கர் நிலப்பரப்பில் ரூ.5 ஆயிரம் கோடி முதலீட்டில் தகவல் தொழில் நுட்பம் மற்றும் தகவல் தொழில் நுட்பம் சார்ந்த நிறுவனங்களுக்கான, பல்வேறு நவீன வசதிகளுடன் ஒரு வளாகத்தினை அமைக்க உள்ளது. இதன் மூலம் 70 ஆயிரம் நபர்களுக்கு நேரடி வேலைவாய்ப்பு உருவாக்க வாய்ப்பு உள்ளது.

நாட்டில் முதல் மாநிலம்

இதற்காக சென்னையில் ரூ.1,150 கோடி மதிப்பில் சாலை விரிவாக்கம் உள்பட பல்வேறு அடிப்படை பணிகளும் செய்யப்பட்டு வருகிறது. தொழில் முதலீட்டாளர்களை இருகரம் நீட்டி தமிழக அரசு வரவேற்கிறது. தொழில் தொடங்க அனுமதி மற்றும் அனைத்து கட்டமைப்பு வசதிகளையும் குறுகிய காலத்தில் வழங்கியும் வருகிறது. இதன் மூலம் தமிழகம், இந்தியாவில் தொழில் வளர்ச்சியில் முதல் மாநிலமாக உயரும் என்பதை உறுதிபட இந்த நிகழ்ச்சியின் மூலம் தெரிவித்துக் கொள்கிறேன்.

இவ்வாறு அவர் பேசினார்.