சட்டமன்றத்திற்கு குட்கா எடுத்து சென்ற விவகாரம்: உரிமை மீறல் புதிய நோட்டீசுக்கு இடைக்கால தடை - ஐக்கோர்ட்டு உத்தரவு

சென்னை,

தமிழகத்தில் தடை செய்யப்பட்டுள்ள குட்கா உள்ளிட்ட புகையிலை பொருட்கள் தாராளமாக கிடைப்பதாக எதிர்க்கட்சியினர் குற்றம் சாட்டினர். கடந்த 2017-ம் ஆண்டு சட்டமன்ற கூட்டத்தொடரின்போது, தடை செய்யப்பட்ட குட்கா உள்ளிட்ட புகையிலை பொருட்களை தி.மு.க.வினர் கொண்டு சென்று சபாநாயகரிடம் காண்பித்தனர்.

இதையடுத்து தி.மு.க. தலைவரும், எதிர்க்கட்சி தலைவருமான மு.க.ஸ்டாலின் உள்ளிட்ட தி.மு.க. எம்.எல்.ஏ.க்கள் மீது நடவடிக்கை எடுக்க உரிமைக்குழுவுக்கு பரிந்துரைக்கப்பட்டது. இதன்படி தி.மு.க. எம்.எல்.ஏ.க்கள் அனைவருக்கும் உரிமைக்குழு நோட்டீஸ் அனுப்பியது. இதை எதிர்த்து சென்னை ஐகோர்ட்டில் மு.க.ஸ்டாலின் உள்ளிட்ட தி.மு.க. எம்.எல்.ஏ.க்கள் வழக்கு தொடர்ந்து, அந்த நோட்டீசுக்கு தடை பெற்றனர்.

இதனைத்தொடர்ந்து, கடந்த 7 ஆம் தேதியன்று கூடிய பொள்ளாச்சி ஜெயராமன் தலைமையிலான உரிமைக்குழு, ஜூலை 19, 2017 அன்று நடைபெற்ற நிகழ்வுகள் குறித்து மீண்டும் விவாதித்ததாகக் கூறி தமிழக சட்டப்பேரவைச் செயலாளர், திமுக எம்.எல்.ஏக்களுக்கு நோட்டீஸ் வழங்கியுள்ளார். மேலும் செப்டம்பர் 14ம் தேதி அன்று திமுக எம்எல்ஏக்கள் இது குறித்து பதிலளிக்கவும் உத்தரவிடப்பட்டுள்ளது.

இந்த சூழலில் உரிமைக்குழு மீண்டும் அனுப்பிய நோட்டீசை எதிர்த்து திமுக தலைவர் ஸ்டாலின் உள்ளிட்ட 18 எம்.எல்.ஏ.க்கள் சென்னை உயர்நீதிமன்றத்தில் மனுத்தாக்கல் செய்தனர். இந்நிலையில் உரிமை மீறல் குழு 2வது முறையாக அனுப்பிய நோட்டீச எதிர்க்கும் திமுக மனு மீது உயர் நீதிமன்றத்தில் நேற்று விசாரணைக்கு வந்தது.

அப்போது திமுக சார்பில் ஆஜரான வழக்கறிஞர், “தடை செய்யப்பட்ட குட்கா பொருட்களை சட்டமன்றத்தில் எடுத்து வந்து காட்டியது உரிமை மீறிய செயல் அல்ல என்று தலைமை நீதிபதி அமர்வு உத்தரவிட்டுள்ளது” என்று தெரிவித்தார். மேலும் தடையை மீறி குட்கா வைத்திருந்தால் அதை குற்ற வழக்காக நீதிமன்றம் தான் விசாரிக்க முடியுமே தவிர, உரிமை மீறல் குற்றச்சாட்டை எழுப்பக் கூடாது என்று அந்த தீர்ப்பில் தெரிவிக்கப்பட்டிருந்ததாக அவர் கூறினார்.

“குட்கா பொருட்கள் தடையை தீவிரமாக அமல்படுத்த வேண்டும் என்பதற்காகத் தான் அதை அவர்கள் சட்டமன்றத்தில் காண்பித்தார்களே தவிர அதில் எந்த உள்நோக்கமும் கிடையாது” என்று தலைமை நீதிபதி உத்தரவில் குறிப்பிட்டுள்ளதை மேற்கோள் காட்டி திமுக தரப்பு வழக்கறிஞர் வாதிட்டார்.

மேலும், உரிமைக்குழு தலைவர் ஜெயராமன் மீது ஸ்டாலின் ஏற்கனவே வழக்கு தொடர்ந்துள்ளதால், பாரபட்சம் காரணமாக தற்போது இந்த உரிமை மீறல் நோட்டிஸ் அனுப்பப்பட்டுள்ளதாக அவர் தெரிவித்தார்.

இதனை தொடர்ந்து தமிழக அரசு தரப்பில் ஆஜரான தலைமை வழக்கறிஞர், உரிமைக்குழு தலைவர் பாரபட்சமாக நடந்து கொண்டார் என்று கருதினால், குழுவிலேயே அது சம்பந்தமாக ஆட்சேபம் தெரிவிக்கலாம் என்றும் புதிய நோட்டீசுக்கு பதிலளிக்க செப்டம்பர் 24 வரை அவகாசம் வழங்கப்பட்டுள்ளதாவும் தெரிவித்தார்.

இதனையடுத்து இந்த வழக்கில் இடைகால உத்தரவை இன்று(செப் 24) பிறப்பிப்தாக நேற்று நீதிபதி தெரிவித்தார். அதன் அடிப்படையில் இன்று உரிமைக்குழு அனுப்பிய நோட்டீசுக்கு இடைக்கால தடை விதித்து நீதிபதி உத்தரவு பிறப்பித்துள்ளார்.

இந்த மனுவுக்கு வரும் அக்டோபர் 28 ஆம் தேதிக்குள் பதிலளிக்க வேண்டும் என்று தமிழக சட்டமன்ற சபாநாயகருக்கும், சட்டமன்ற செயலாளர் மற்றும் உரிமைக்குழுவும் நோட்டீஸ் அனுப்ப உத்தரவிட்டு, விசாரணையை அக்டோபர் 28 ஆம் தேதிக்கு தள்ளிவைக்க நீதிபதி உத்தரவிட்டுள்ளார்.