தங்கம் விலை பவுனுக்கு ரூ.1,464 குறைந்தது -வெள்ளியும் கிலோவுக்கு ரூ.400 வீழ்ச்சி

சென்னை, 

கடந்த 1-ந்தேதி ஒரு கிராம் தங்கம் ரூ.4 ஆயிரத்து 815-க்கும், ஒரு பவுன் ரூ.38 ஆயிரத்து 520-க்கும் விற்பனை ஆனது. இதைதொடர்ந்து தங்கம் விலையில் ஏற்றம், இறக்கம் காணப்பட்டு நிலையற்ற தன்மை இருந்து வருகிறது.

இந்தநிலையில் நேற்று முன்தினம் ஒரு கிராம் ரூ.4 ஆயிரத்து 863-க்கும், ஒரு பவுன் ரூ.38 ஆயிரத்து 904-க்கும் தங்கம் விற்பனை செய்யப்பட்டது. இது நேற்று 183 குறைந்து ஒரு கிராம் ரூ.4 ஆயிரத்து 680 ஆகவும், ரூ.1,464 குறைந்து பவுன் ரூ.37 ஆயிரத்து 440-க்கும் விற்பனை செய்யப்பட்டது.

இதேபோல வெள்ளி விலையும் கணிசமாக குறைந்துள்ளது. நேற்று முன்தினம் ஒரு கிராம் 65 ரூபாய் 80 காசுக்கும், ஒரு கிலோ ரூ.65 ஆயிரத்து 800-க்கும் வெள்ளி விற்பனையானது. நேற்று 40 காசு குறைந்து ஒரு கிராம் 65 ரூபாய் 40 காசுக்கும், ரூ.400 குறைந்து ஒரு கிலோ ரூ.65 ஆயிரத்து 400-க்கும் விற்பனை ஆனது.

இதுகுறித்து நகை வியாபாரிகள் கூறுகையில், “கொரோனா பரவல் காரணமாக பல்வேறு நாடுகளில் விதிக்கப்பட்டிருந்த கட்டுப்பாடுகள் படிப்படியாக தளர்த்தப்பட்டு வருகின்றன. பொருளாதார சந்தைகள் மீண்டும் படிப்படியாக திறக்கப்படுவதால், நிறுவனங்களின் மீதான முதலீடுகள் கணிசமாக அதிகரித்து வருகிறது. அதேசமயத்தில் தங்கத்தின் மீது முதலீடு செய்வது குறைந்து வருகிறது. இதனால் தங்கத்தின் விலை குறைந்துள்ளது. இது மேலும் குறையுமா? என்பது வரும் நாட்களில் தான் தெரியவரும்” என்றனர்.