மாநில செய்திகள்

தமிழகத்தில் 779 ஏரிகள் நிரம்பின அமைச்சர் ஆர்.பி.உதயகுமார் தகவல் + "||" + Minister RP Udayakumar informed that 779 lakes in Tamil Nadu are full

தமிழகத்தில் 779 ஏரிகள் நிரம்பின அமைச்சர் ஆர்.பி.உதயகுமார் தகவல்

தமிழகத்தில் 779 ஏரிகள் நிரம்பின அமைச்சர் ஆர்.பி.உதயகுமார் தகவல்
14 ஆயிரத்து 144 ஏரிகளில், 779 ஏரிகள் 100 சதவீதம் முழு கொள்ளளவை எட்டியுள்ளது என்று அமைச்சர் ஆர்.பி.உதயகுமார் தெரிவித்துள்ளார்.
சென்னை, 

தற்போது எதிர்கொண்டு வரும் வடகிழக்கு பருவமழையில் நீர் சேமிப்பு, உபரி நீர் வெளியேற்றத்தின்போது தேவையான முன்னெச்சரிக்கை நடவடிக்கைகளை மேற்கொள்வது உள்ளிட்ட அம்சங்கள் குறித்து முதல்-அமைச்சர் எடப்பாடி பழனிசாமியின் உத்தரவின் பேரில் 36 மாவட்டங்களும், பெருநகர சென்னை மாநகராட்சியின் 15 மண்டலங்களுக்கும் பேரிடர், கண்காணிப்பு பணிகளை மேற்கொண்டு அறிவுரைகளை வழங்க மூத்த ஐ.ஏ.எஸ். அதிகாரிகள் நியமிக்கப்பட்டு, அவர்கள் தொடர் கண்காணிப்பில் ஈடுபட்டு வருகின்றனர். வடகிழக்கு பருவமழை தொடர்பாக வருவாய் பேரிடர் சார்பில் 24 மணிநேரம் தொடர் கண்காணிப்பு பணியினை அதிகாரிகள் மேற்கொண்டு வருகின்றனர்.

இந்தநிலையில் சமூக வலைத்தளங்களில் வரும் வதந்திகளை பொதுமக்கள் நம்பவேண்டாம். ஆதாரமற்ற செவி வழியாக கேட்கக்கூடிய செய்திகளை, தவறான தகவல்களை உள்நோக்கத்துடனே அல்லது உள்நோக்கம் இன்றியோ வெளியிட்டு வருகின்றனர். வெள்ள நீர், உபரி நீர் வெளியேற்றம் தொடர்பாக அணைகளின் நிலைகளை பொதுப்பணிதுறை, மாவட்ட நிர்வாகம் உள்பட மாநில பேரிடர் மற்றும் பிற துறை அதிகாரிகளும் தொடர்ந்து கண்காணித்து அரசுக்கு தகவல்களை அளித்து வருகின்றனர். அந்த தகவல்களின் அடிப்படையில் அரசு தரும் அறிக்கைகள், அறிவிப்புகளை பொதுமக்கள் பின்பற்றவேண்டும். வதந்திகளை யாரும் நம்பவேண்டாம். வடகிழக்கு பருவமழை தொடர்பாக வதந்தி, தவறான தகவல்களை பரப்புபவர்கள் மீது கடும் நடவடிக்கை எடுக்கப்படும்.

779 ஏரிகள் நிரம்பின

14 ஆயிரத்து 144 ஏரிகளில், 779 ஏரிகள் 100 சதவீதம் முழு கொள்ளளவினை எட்டியுள்ளது. விதிமுறைகளின்படி அதில் இருந்து உபரி நீரை வெளியேற்ற நடவடிக்கை எடுக்கப்பட்டு வருகிறது. அதனை 24 மணி நேரமும் தொடர்ச்சியாக கண்காணிக்கப்பட்டு வருகிறது. 9 ஆயிரத்து 521 பாசன ஏரிகளில் 714 ஏரிகள் 100 சதவீதம் முழு கொள்ளளவை எட்டியுள்ளது. செம்பரம்பாக்கம் ஏரி நிரம்பும்போது அடையாறு ஆற்றில் குறைந்த அளவு நீர் மட்டுமே வெளியேற்றப்படும் சூழல் தற்போது உள்ளது.

மணிமங்கலம், சோமனூர் ஆகிய இடங்களில் தண்ணீர் அதிகமானாலும் அனைத்து சூழலையும் எதிர்கொள்ள அரசு தயாராக உள்ளது. இதற்கு போதுமான ஒத்துழைப்பை பொதுமக்கள் வழங்க வேண்டும். காற்றழுத்த தாழ்வுநிலை உருவாகி அதன்மூலம் நமக்கு தொடர் மழை கிடைத்தாலும் உபரி நீர் வெளியேற்றும் சூழ்நிலைவந்தாலும், அதனால் ஏற்படும் பாதிப்புகளை எதிர்கொள்ள அனைத்து வகையிலும் அரசு தயாராக உள்ளது.

அச்சம் வேண்டாம்

தாழ்வான பகுதிகளில் தேங்கிய மழை நீரை வெளியேற்ற நடவடிக்கை எடுக்கப்பட்டு வருகிறது. எனவே மக்கள் அச்சம் கொள்ள தேவையில்லை. வடகிழக்கு பருவமழை தொடர்பாக 1 மணி நேரத்திற்கு ஒரு முறை ஆலோசனை நடத்த வேண்டும் என முதல்-அமைச்சர் உத்தரவிட்டுள்ளார். மேலும் வடகிழக்கு பருவமழை தொடர்பாக முதல்-அமைச்சர், அடிக்கடி அதிகாரிகளை தொடர்பு கொண்டு நிலைமையை கேட்டறிந்து அறிவுரைகளை வழங்கி வருகிறார். உயிரிழப்பு இல்லாத பேரிடரை எதிர்கொள்ளவேண்டும் என்பதே அரசின் நிலை.

இவ்வாறு அவர் கூறினார்.

பேட்டியின்போது வருவாய்த்துறை கூடுதல் தலைமைச் செயலாளர் அதுல்ய மிஸ்ரா, வருவாய் நிர்வாக கமிஷனர் க.பணீந்திர ரெட்டி, பேரிடர் மேலாண்மை ஆணையர் டி.ஜகந்நாதன், இணை இயக்குனர் ரா.பன்னீர்செல்வம் மற்றும் அதிகாரிகள் உடன் இருந்தனர்.

தொடர்புடைய செய்திகள்

1. நன்னிலம் அருகே புத்தாற்றின் குறுக்கே ரூ.3 கோடியில் புதிய பாலங்கள் அமைச்சர் காமராஜ் திறந்து வைத்தார்
நன்னிலம் அருகே புத்தாற்றின் குறுக்கே ரூ.3 கோடியில் கட்டப்பட்ட புதிய பாலங்களை அமைச்சர் காமராஜ் திறந்து வைத்தார்.
2. அரசு சிமெண்டு ஆலையில் நிரந்தர பணி கேட்ட ஆனந்தவாடி கிராம மக்களின் கோரிக்கைகள் பரிசீலிக்கப்படும் அமைச்சர் தகவல்
அரியலூர் அரசு சிமெண்டு ஆலைக்கு ஆனந்தவாடி கிராமத்தில் இருந்து சுண்ணாம்புக்கல் எடுப்பதற்காக, அந்த கிராம மக்களுடனான ஆலோசனை கூட்டம் அரியலூர் கலெக்டர் அலுவலகத்தில் நேற்று நடந்தது.
3. தேர்தலில் முழுமையான வெற்றியைபெற ஒவ்வொரு பூத் அளவிலும் 45 மகளிரை நியமிக்க வேண்டும் அமைச்சர் பேச்சு
தேர்தலில் முழுமையான வெற்றியை பெற ஒவ்வொரு பூத் அளவிலும் 45 மகளிரை நியமிக்க வேண்டும் என்று திருப்பூர் புறநகர் மேற்கு மாவட்ட செயலாளராக பொறுப்பேற்றுக்கொண்ட அமைச்சர் உடுமலை கே.ராதாகிருஷ்ணன் கூறினார்.
4. புதுக்கோட்டை மாவட்டத்தில் சிறு தானியங்கள் 1½ லட்சம் எக்டேரில் சாகுபடி கலெக்டர் தகவல்
புதுக்கோட்டை மாவட்டத்தில் சிறுதானியங்கள் 1½ லட்சம் எக்டேரில் சாகுபடி செய்யப்பட்டுள்ளதாக கலெக்டர் உமாமகேஸ்வரி தெரிவித்தார்.
5. வடகிழக்கு பருவமழை: டெங்கு காய்ச்சல் தடுப்பு பணிகள் தீவிரம் கலெக்டர் ராமன் தகவல்
வடகிழக்கு பருவமழை பெய்து வருவதால் சேலம் மாவட்டத்தில் டெங்கு காய்ச்சல் தடுப்பு பணிகள் தீவிரமாக மேற்கொள்ளப்பட்டு வருவதாக கலெக்டர் ராமன் கூறினார்.