டெல்லியில் போராடும் விவசாயிகளுக்கு ஆதரவாக தமிழகம் முழுவதும் திமுக ஆர்ப்பாட்டம்

சென்னை:

டெல்லியில் போராடி வரும் விவசாயிகளுக்கு ஆதரவாக 5-ந்தேதி கருப்புக்கொடி ஏந்தி ஆர்ப்பாட்டம் நடத்தப்படும் என்று தி.மு.க. மாவட்ட செயலாளர்கள் கூட்டத்தில் தீர்மானம் நிறைவேற்றப்பட்டது.

 அதன்படி விவசாயிகளின் உணர்வு கொந்தளிப்பான வாழ்வுரிமைப் போராட்டத்திற்கு உரிய மதிப்பளித்து, மூன்று வேளாண் சட்டங்களையும் உடனடியாக மத்திய பா.ஜ.க. அரசு திரும்பப் பெற வேண்டும் என்று வலியுறுத்தியும்; விவசாயிகளின் ஜீவாதார உரிமைகளைப் போற்றவும், இந்திய வேளாண்மைத்துறை வீழ்ந்து விடாமல் காப்பாற்றவும், தலைநகரம் டெல்லியில் தொடர்ந்து தொய்வின்றி நடைபெற்று வரும் விவசாயிகளின் மகத்தான போராட்டத்திற்கு உணர்வு பூர்வமான ஆதரவு தெரிவித்தும் தி.மு.க. சார்பில், இன்று தமிழகத்தின் அனைத்து மாவட்டத் தலைநகரங்களிலும், கருப்புக் கொடி ஏந்தி, திமுகவினர் ஆர்ப்பாட்டம் நடத்தி வருகின்றனர்.

சென்னையில் நடைபெற்ற கருப்புக்கொடி ஆர்ப்பாட்டத்தில் தயாநிதி மாறன், சேகர்பாபு உள்ளிட்டோர் கலந்து கொண்டனர்.

வேளாண் சட்டத்துக்கு எதிராக சேலத்தில் மு.க.ஸ்டாலின் தலைமையில் போராட்டம் நடைபெற உள்ளது. போராட்டத்துக்கு சேலம் சுற்றுவட்டாரத்தில் இருந்து வருபவர்களை போலீஸ் தடுத்து நிறுத்துவதாக குற்றச்சாட்டு எழுந்துள்ளது.

திருச்சியில் அண்ணா சிலை அருகே  ஆர்ப்பாட்டம் நடந்தது . இந்த ஆர்ப்பாட்டம் திருச்சி மாவட்டத்தில் ஒன்றிணைந்து நடத்தப்பட்டது. திருச்சி தெற்கு மாவட்ட பொறுப்பாளர் அன்பில் மகேஷ் தலைமையில்  ஆர்ப்பாட்டம் நடைபெற்றது.