உதயசூரியன் வடிவில் நின்ற 6000 பேர் - திமுக சார்பில் உலக சாதனை நிகழ்ச்சி

சென்னை,

தமிழகத்தில் சட்டமன்ற தேர்தல் நெருங்கி வரும் நிலையில் அனைத்து அரசியல் கட்சிகளும் தீவிர பிரச்சாரத்தில் ஈடுபட்டு வருகின்றன. அதிமுக, திமுக, மக்கள் நீதி மய்யம் உள்ளிட்ட பல்வேறு கட்சிகளின் தலைவர்கள், மாவட்டம் தோறும் சென்று வாக்கு சேகரிப்பில் ஈடுபட்டு வருகின்றனர். 

அந்த வகையில் திமுக சார்பில் மக்கள் கிராம சபை கூட்டங்கள் நடத்தப்படுகிறது. திமுக தலைவர் ஸ்டாலின், திமுக பொதுச்செயலாளர் துரைமுருகன், திமுக மகளிர் அணி செயலாளர் கனிமொழி உள்ளிட்டோர் மக்களை சந்தித்து பிரச்சாரம் மேற்கொள்கின்றனர்.

இந்நிலையில் சென்னை கொட்டிவாக்கத்தில் உள்ள ஒய்.எம்.சி.ஏ.மைதானத்தில், உதயசூரியன் போன்ற வடிவில் 6 ஆயிரம் பேர் நின்று உலக சாதனை படைக்கும் நிகழ்ச்சி நடைபெற்றது. இதனை பார்வையிட்ட திமுக தலைவர் ஸ்டாலின், சாதனை சான்றிதழை பெற்று கொண்டார். பின்னர் நிகழ்ச்சியில் பேசிய அவர், உதயசூரியன் வடிவத்தில் நின்றவர்களுக்கு வாழ்த்துக்களை தெரிவித்தார். மக்களிடையே ஏற்பட்டுள்ள எழுச்சியை காணும் போது வருகிற சட்டமன்ற தேர்தலில், 234 தொகுதிகளிலும், திமுக வெற்றி பெறுவது உறுதி என அவர் நம்பிக்கை தெரிவித்தார்.