25 நாட்களுக்கு பிறகு பாரடைஸ் பீச்சுக்கு செல்ல அனுமதி

பாரடைஸ் பீச்சுக்கு செல்ல 25 நாட்களுக்கு பிறகு அனுமதி அளிக்கப்பட்டதையொட்டி சுற்றுலா பயணிகள் குவிந்தனர். அங்கு சுற்றுலா பயணிகள் உற்சாக குளியல் போட்டு மகிழ்ந்தனர்.

புதுவைக்கு வார இறுதி நாட்களில் வெளிநாடுகள், வெளிமாநிலங்களில் இருந்து ஏராளமான சுற்றுலா பயணிகள் வருவது வழக்கம். பருவமழை ஓய்ந்து இயல்பு நிலை திரும்பியதால் கடந்த சில நாட்களாக சுற்றுலா பயணிகள் வருகை அதிகரித்துள்ளது. வார விடுமுறை நாளான நேற்று புதுச்சேரியில் சுற்றுலா பயணிகள் குவிந்தனர். 

கடற்கரை, பாரதி பூங்கா, தாவரவியல் பூங்கா, நோணாங்குப்பம் படகு குழாம், மணக்குள விநாயகர் கோவில், அரவிந்தர் ஆசிரமம், பாண்டி மெரினா பீச் உள்ளிட்ட சுற்றுலா தலங்களில் சுற்றுலா பயணிகள் மற்றும் உள்ளூர் மக்கள் கூட்டம் அதிகமாக காணப்பட்டது. 

கடற்கரை சாலையில் தலைமை செயலகம் மற்றும் பழைய துறைமுக பாலம் பகுதியில் உருவாகியுள்ள மணல் பரப்பில் சுற்றுலா பயணிகளும், உள்ளூர் மக்களும் கடலில் இறங்கி குளித்து மகிழ்ந்தனர்.

நோணாங்குப்பம் படகு குழாமில் மக்கள் கூட்டம் அதிகமாக இருந்தது. கனமழையால்  சங்கராபரணி ஆற்றில் ஏற்பட்ட வெள்ளப்பெருக்கு காரணமாக பாரடைஸ் பீச்சுக்கு சுற்றுலா பயணிகள் செல்ல தடை விதிக்கப்பட்டு இருந்தது. தற்போது வெள்ளம் குறைந்ததை தொடர்ந்து 25 நாட்களுக்கு பிறகு தற்போது அனுமதி அளிக்கப்பட்டது. இதையடுத்து படகில் உற்சாகமாக சவாரி செய்த சுற்றுலா பயணிகள் பாரடைஸ் பீச்சுக்கு சென்று குளியல் போட்டனர். சின்னவீராம்பட்டினம் கடற்கரையிலும் மக்கள் கூட்டம் அதிகம் இருந்தது.

புதுச்சேரி நகர பகுதியில் நேற்று ஏராளமான வெளிமாநில பதிவெண் கொண்ட கார்கள் உலா வந்தன. இதனால் நகரின் முக்கிய வீதிகளில் போக்குவரத்து நெரிசல் ஏற்பட்டது. அப்போது அங்கு பணியில் இருந்த போலீசார் போக்குவரத்தை சீரமைத்தனர்.

புதுச்சேரியில் நேற்று சண்டே மார்க்கெட் செயல்படும் காந்திவீதியில் பொதுமக்கள், சுற்றுலா பயணிகள் அதிகம் குவிந்தனர். கிறிஸ்துமஸ் பண்டிகைக்கு இன்னும் 13 நாட்களே இருப்பதால் குடில்கள் அமைக்க தேவையான பொருட்கள், அலங்கார பல்புகளை பலர் ஆர்வத்துடன் வாங்கிச் சென்றனர்.