டாஸ்மாக் ‘பார்'களில் தின்பண்டம் விற்க புதிய டெண்டர் தமிழக அரசு அறிவிப்பு

சென்னை,

டாஸ்மாக் நிறுவனத்தின் அனைத்து மண்டல மேலாளர்கள், மாவட்ட மேலாளர்களுக்கு மேலாண்மை இயக்குனர் எல்.சுப்பிரமணியன் அனுப்பிய கடிதத்தில் கூறப்பட்டிருப்பதாவது:-

டாஸ்மாக் சில்லறை மதுக்கடைகளின் இணைப்பில் உள்ள மதுக்கூடங்களில் (பார்) தின்பண்டங்கள் விற்பனை மற்றும் காலி பாட்டில்களை சேகரித்தல் ஆகியவற்றுக்கு இந்த மாதம் புது டெண்டர் கோரப்பட வேண்டும்.

அடிப்படையில் ‘அப்செட் பிரைஸ்’ என்ற ஏற்றத்தாழ்வு விலை நிர்ணயம் செய்யப்பட்டு, வெளிப்படை டெண்டர் விதிகளின் அடிப்படையில் 2 ஆண்டுகளுக்கான டெண்டரை இந்த மாதம் கோர வேண்டும்.

புதிய மதுக்கூட ஒப்பந்தங்கள் ஜனவரி 1-ந்தேதி முதல் அமலுக்கு வரும். மதுக்கூடத்தின் மாதாந்திர உரிம கட்டணம் அந்த 2 ஆண்டுகளுக்கு நிலையாக இருக்கும்.

தற்போதுள்ள டெண்டர் நடைமுறைகளை மீறி செயல்படுவோர் மீது நடவடிக்கை எடுக்கப்படும்.

இவ்வாறு அதில் கூறப்பட்டுள்ளது.