மூதாட்டியிடம் 10 பவுன் நகை பறிப்பு

காரைக்காலை அடுத்த திருநள்ளாறு பேட்டை ரோட்டில் வசிப்பவர் லீலாவதி (வயது 62). இவர் வீட்டின் முன் பெட்டிக்கடை வைத்துள்ளார். சம்பவத்தன்று இவரது கடைக்கு மோட்டார் சைக்கிளில் 2 பேர் வந்தனர். அவர்கள் கேட்ட பொருட்களை லீலாவதி எடுத்துக் கொண்டிருந்த போது அவரது கழுத்தில் கிடந்த 10 பவுன் நகையை அந்த ஆசாமிகள் பறித்தனர். இதை சற்றும் எதிர்பார்க்காத லீலாவதி கூச்சல் போட்டார். சத்தம் கேட்டு அவரது மகன் ரமேஷ்ராஜா மற்றும் அக்கம்பக்கத்தினர் ஓடி வந்தனர். அதற்குள் 2 பேரும் மோட்டார் சைக்கிளில் தப்பிச் சென்றனர்.

இதுகுறித்து புகார் செய்யப்பட்டதன்பேரில் திருநள்ளாறு போலீஸ் இன்ஸ்பெக்டர் லெனின்பாரதி மற்றும் போலீசார் வழக்குப்பதிவு செய்து மூதாட்டியிடம் 10 பவுன் நகையை பறித்துச் சென்ற மர்ம நபர்களை வலைவீசி தேடி வருகின்றனர்.