வனவிலங்குகளுக்கு பாதிப்பு: தண்டவாளம் அருகே சூரிய மின்சக்தி வேலிகள் அமைக்க வேண்டாம்

சென்னை,

ரெயில்கள் மோதி யானைகள் பலியான சம்பவங்கள் தொடர்பாக சென்னை ஐகோர்ட்டு தாமாக முன் வந்து வழக்கை விசாரணைக்கு எடுத்துக்கொண்டது.

இந்த வழக்கை நீதிபதிகள் வி.பாரதிதாசன், என்.சதீஷ்குமார் ஆகியோர் கொண்ட சிறப்பு டிவிஷன் பெஞ்ச் விசாரித்து வருகிறது.

இந்த வழக்கில் நீதிபதிகள் பிறப்பித்த உத்தரவின் அடிப்படையில் தெற்கு ரெயில்வே நிர்வாகமும், தமிழக வனத் துறையும் விரிவான அறிக்கையை தாக்கல் செய்தன. இந்த நிலையில் இந்த வழக்கு நீதிபதிகள் முன்பு மீண்டும் விசாரணைக்கு வந்தது. வழக்கை விசாரித்த நீதிபதிகள் பிறப்பித்த உத்தரவில் கூறியிருப்பதாவது:-

வேகம் குறைப்பு

கோவை-பொள்ளாச்சி-பாலக்காடு வழித்தடத்தில் செல்லும் ரெயில்களின் வேகத்தை மணிக்கு 45 கிலோ மீட்டர் என்று குறைத்தது போதாது. வேகத்தை மேலும் குறைப்பது குறித்து நிபுணர் குழுவுடன் கலந்தாலோசித்து வருகிற 25-ந் தேதிக்குள் தெற்கு ரெயில்வே நிர்வாகம் அறிக்கை தாக்கல் செய்ய வேண்டும்.

ரெயில்வே தண்டவாளங்கள் அருகில் சூரிய மின்சக்தி வேலிகளை அமைப்பது வன விலங்குகளுக்கு பாதிப்பை ஏற்படுத்தும் என வனத்துறை ஆட்சேபம் தெரிவிக்கிறது.

வேலி வேண்டாம்

இந்த விவகாரத்தில் ரெயில்வே மற்றும் வனத்துறை அதிகாரிகள் கலந்து பேசி தீர்வுகாண வேண்டும்.

அதுவரை சூரிய மின்சக்தி வேலிகளை ரெயில்வே நிர்வாகம் அமைக்க வேண்டாம்.

அதேபோல யானைகள் கடந்து செல்வதற்கான சுரங்க பாதைகளை அமைப்பதற்காக ரெயில்வே வாரியம் நிதி ஒதுக்க வேண்டும்.

இப்பணிகளின் முன்னேற்றம் குறித்து வருகிற மார்ச் 18-ந் தேதி தெற்கு ரெயில்வே நிர்வாகம், வனத்துறை அறிக்கை தாக்கல் செய்ய வேண்டும்.

பரிசீலிக்க வேண்டும்

வன விலங்குகள் பாதுகாப்பு திட்டத்திற்காக மத்திய அரசிடம் நிதி ஒதுக்குமாறு தமிழக அரசு கடிதம் அனுப்பியுள்ளது. அந்த கோரிக்கையை இரு வாரங்களுக்குள் பரிசீலித்து தகுந்த உத்தரவை மத்திய சுற்றுச்சூழல் துறை பிறப்பிக்க வேண்டும். இந்த வழக்கை வருகிற மார்ச் மாதத்துக்கு தள்ளி வைக்கிறோம்.

இவ்வாறு நீதிபதிகள் கூறியுள்ளனர்.