லதா மங்கேஷ்கர் மறைவுக்கு தமிழக அரசியல் கட்சி தலைவர்கள், திரை பிரபலங்கள் இரங்கல்

சென்னை,

கொரோனா தொற்று காரணமாக மருத்துவமனையில் சிகிச்சை பெற்று வந்த பழம்பெரும் பாடகர் லதா மங்கேஷ்கர் இன்று காலை காலமானார். அவருக்கு வயது 92. 

சுமார் 20 நாட்களுக்கும் மேலாக கொரோனா தொற்றுக்காக மும்பை ப்ரீச் கேண்டி மருத்துவமனையில் சிகிச்சை பெற்று வந்த அவருக்கு இன்று காலை அடுத்தடுத்த பல உறுப்புகளும் செயலிழக்க 8.30 மணியளவில் அவரது உயிர் பிரிந்தது.

லதா மங்கேஷ்கரின்  உடல் இன்று மாலை 6.30 மணி அளவில் முழு அரசு மரியாதையுடன் அடக்கம் செய்யப்படும் எனத் தெரிவிக்கப்பட்டுள்ளது.

லதா மங்கேஷ்கர் மறைவுக்கு பிரதமர் மோடி, சோனியாகாந்தி, ஜனாதிபதி, ராகுல்காந்தி,  தமிழக கவர்னர் ஆர்.என்.ரவி, தெலுங்கானா ஆளுநரும், புதுச்சேரி துணைநிலை ஆளுநருமான தமிழிசை சௌந்தரராஜன், மத்திய உள்துறை மந்திரி, மத்திய இணை மந்திரி  எல்.முருகன், பாஜக தேசிய தலைவர் ஜெ.பி.நட்டா

அரசியல் கட்சி தலைவர்கள், சினிமா பிரபலங்கள், நடிகர், நடிகைகள் உள்ளிட்டோர் இரங்கல் தெரிவித்துள்ளனர்.

இந்திய சினிமாவின் தலைசிறந்த பாடகி, இசைக்குயில் லதா மங்கேஷ்கர் உடல் நலமின்மையால் காலமான செய்தி மிகவும் வருத்தமளிக்கிறது.அவரின் ஆத்மா சாந்தி அடைய இறைவனை பிரார்த்திக்கிறேன்"

-மத்திய இணை மந்திரி எல்.முருகன் டுவீட்

* திமுக எம்.பி., கனிமொழி வெளியிட்டுள்ள இரங்கல் செய்தியில்,

 “தன் இனிய குரலால் இந்திய மக்களைக் கவர்ந்த மரியாதைக்குரிய லதா மங்கேஷ்கர் அவர்கள், மறைந்த செய்தி வருத்தமளிக்கிறது. அவரது குடும்பத்திற்கும், அவரது ரசிகர்களுக்கும் எனது ஆழ்ந்த இரங்கல். அவர் குரலால் நம்மிடையே எப்போதும் வாழ்வார்” எனத் தெரிவித்துள்ளார்

இசையமைப்பாளர் ஏஆர் ரஹ்மான் தனது ட்விட்டர் பதிவில் அன்பும் , மரியாதையும், அஞ்சலியும். என்று குறிப்பிட்டுள்ளார்.

* திமுக பொதுச்செயலாளரும் ராஜ்யசபா எம்.பி.யுமான வைகோ வெளியிட்டுள்ள இரங்கல்: 

இசை என்றாலே புகழ். அந்த இசைத்துறையில் புகழ்க்கொடி நாட்டி, இன்று நம்மை எல்லாம் கண்ணீரில் ஆழ்த்தி விடைபெற்றுள்ளார் இசைக்குயில் லதா மங்கேஷ்கர். அவருடைய பாடல்கள், அவரது குரலில் கேட்கும்போது, அது நம்மை எங்கோ இழுத்துச் செல்லும். கோவா மாநிலத்தில் மங்கேஷ்கர் கிராமத்தில் பிறந்த லதா, 1942 ஆம் ஆண்டு, 13 ஆவது வயதில் பாடத் தொடங்கினார். இசைதான் அவரது மூச்சு. ஏறத்தாழ 80 ஆண்டுகளாகப் பாடினார் பாடினார் பாடிக்கொண்டே இருந்தார்.

இசைக்கு எல்லைகள் இல்லை, எந்தத் தடையும் இல்லை. எனவே, இந்தியாவின் அத்தனை மொழித் திரைப்படங்களிலும் அவர் பாடினார். அந்தக் காலத்தில், வானொலிகளில் தமிழ்நாடு முழுமையும் அவரது பாடல்கள் ஒலித்தன. நான் ஒரு இசை ரசிகன். எத்தனையோ சோதனைகளுக்கு இடையில் எனக்கு ஆறுதலாக இருப்பது இசைதான். மாணவப் பருவத்தில் சென்னையில் எத்தனையோ ஆங்கிலத் திரைப்படங்களைப் பார்த்து இருக்கின்றேன். இந்திப் படங்களையும் பார்த்து இருக்கின்றேன். எனக்கு அந்த மொழி புரியாவிட்டாலும், லதா மங்கேஷ்கரின் பாடல்களும், அவரது இனிய குரலும் காதுகளில் ஒலித்துக்கொண்டே இருக்கும். உயிரோட்டமான குரல் அது. உணர்ச்சிகளின் கலவையாக ஒலித்தது. அவர் தமிழிலும் பாடினார். வானரதம் திரைப்படத்தில், எந்தன் கண்ணாளன் கடல் நோக்கிப் போகின்றான் என்று அவர் பாடிய பாடலை இன்றைக்கும் யூடியூப் காணொளியில் பார்க்க முடிகின்றது. அவர் பெற்ற விருதுகளைக் கணக்கிட முடியாது. இந்தியாவின் மிக உயரிய பாரத் ரத்னா விருதையும் பெற்றவர். ஆனால், அந்த விருதுகளை விட, தன் குரலால் ஏழை எளிய அடித்தட்டு மக்களுக்கு அவரது குரல் அளித்து வந்த ஆறுதல்தான் மிகப் பெரியது. அளவிட முடியாதது. அவரது குடும்பமே இசைக்குடும்பம்தான். அவரது தங்கை ஆஷாவும் புகழ் பெற்ற பாடகியாகத் திகழ்கின்றார்.

 

கானக்குயில் லதா மங்கேஷ்கர் அவர்கள் இன்று நம்மை விட்டுப் பிரிந்தாலும், அவரது இனிய குரல் அடங்கி விடாது. காற்றில், விண்வெளியில் கலந்து இருக்கின்ற அந்தக் குரல் இன்னும் எத்தனை நூற்றாண்டுகள் கடந்தாலும், அடுத்தடுத்த தலைமுறைகளையும் கவரும்...அவர்களது நெஞ்சங்களில் ஊடுருவிப் பாயும் என்பது திண்ணம். திசை தெரியாத வாழ்க்கையில், இசைக்குயிலாக இடம் பிடித்து இருப்பவர் லதா மங்கேஷ்கர் ஆவார். இசைக்குயில் லதா மங்கேஷ்கர் புகழ், ஏழிசையாய், இசைப்பயனாய், என்றென்றும் நிலைத்து இருக்கும்.

* கே.எஸ். அழகிரி இரங்கல்

 

தமிழக காங்கிரஸ் கமிட்டித் தலைவர் கே.எஸ். அழகிரி தமது இரங்கல் செய்தியில், மருத்துவமனையில் அனுமதிக்கப்பட்டு, சிகிச்சை பலனின்றி தமது 92 வது வயதில் இந்தியாவின் இசைக்குயில் திருமதி லதா மங்கேஷ்கர் காலமான செய்தி கேட்டு மிகுந்த வருத்தமும், துயரமும் அடைந்தேன். ஏறத்தாழ 30 ஆயிரம் பாடல்களை 20 இந்திய மொழிகளில் பாடி கின்னஸ் சாதனை படைத்தவர். மதம், மொழி, இனம், ஜாதி எல்லைகளைக் கடந்து திருமதி லதா மங்கேஷ்கர் பாடலை ரசிக்காதவர்களே இருக்க முடியாது. மெல்லிசை அரசி என அழைக்கப்பட்ட திருமதி லதா மங்கேஷ்கர் பாரத ரத்னா உள்ளிட்ட பல்வேறு விருதுகளைப் பெற்று சாதனை படைத்தவர். இந்தி படங்களில் லதா மங்கேஷ்கர், முகமது ரபி ஆகியோர் இணைந்து பாடிய பாடல்களினால் பல திரைப்படங்கள் வெற்றிபெற்று சாதனை படைத்துள்ளன. இந்தியாவின் பெருமையை தமது குரல் வளத்தால் உலக அரங்கில் உயர்த்திய திருமதி லதா மங்கேஷ்கர் அவர்களது மறைவு ஈடுசெய்ய முடியாத பேரிழப்பாகும். இவரது மறைவால் இந்திய மக்கள் அனைவரும் துக்கத்தில் ஆழ்ந்துள்ளனர். திருமதி லதா மங்கேஷ்கர் மறைவால் வாடும் அவரது குடும்பத்தினருக்கும், எண்ணில் அடங்கா ரசிகர்களுக்கும் தமிழ்நாடு காங்கிரஸ் சார்பில் ஆழ்ந்த இரங்கலையும், அனுதாபத்தையும் தெரிவித்துக்கொள்கிறேன் என குறிப்பிட்டுள்ளார்.

* டிடிவி தினகரன்

 

அம்மா மக்கள் முன்னேற்றக் கழகப் பொதுச்செயலாளர் டிடிவி தினகரன், பிரபல பின்னணி பாடகர் பாரத ரத்னா திருமதி.லதா மங்கேஷ்கர் அவர்கள் காலமானார் என்ற செய்தியறிந்து வருத்தமுற்றேன். அவர் பாடிய காலத்தால் அழியாத பாடல்களின் வழியே என்றென்றும் வாழ்ந்து கொண்டிருப்பார். லதா மங்கேஷ்கர் மறைவால் வாடும் உறவினர்களுக்கும் அவரது ரசிகர்களுக்கும் எனது ஆழ்ந்த இரங்கலைத் தெரிவித்துக்கொள்கிறேன் என குறிப்பிட்டுள்ளார்.

* லதா மங்கேஷ்கர் பாடிய 'ஆஜா சனம் மதுர சாந்தினி மெஹம்' என்ற பாடலை ஜெயலலிதா அடிக்கடி பாடிக்கொண்டே இருப்பார் - வி.கே.சசிகலா

இந்தி, மராத்தியில் பாடத் தொடங்கி, புகழ் ஏணிக்கு சென்ற லதா மங்கேஷ்கர், தமிழிலும் சிறப்பாக பாடியது பெருமைக்குரியது  - கி.வீரமணி

 “ஹே மேரே வத்தன்கி லோகோ...  என்று எல்லைப்புற வீரர்களின் தியாகத்தை லதா மங்கேஷ்கர் பாடிய போது நாடே அழுதது; அவர் மறைவு செய்தி கேட்டு இன்றும் அழுகிறது; மனதில் வாழும் அவருக்கு மரணமில்லை ” 

-தமிழக பாஜக தலைவர் அண்ணாமலை டூவீட் 

“லதா மங்கேஷ்கர் மறைவு இந்திய சினிமா மற்றும் உலக இசைத்துறைக்கு பேரிழப்பு ; அவரை இழந்து வாடும் குடும்பத்தினருக்கு ஆழந்த இரங்கலை தெரிவித்துக்கொள்கிறேன்”

- இயக்குநர் பாரதிராஜா டுவீட்

லதா மங்கேஷ்கர் மறைவுக்கு இசையமைப்பாளர் ஏ.ஆர். ரகுமான் இரங்கல் தெரிவித்து ட்வீட்: ”அன்பும், மரியாதையும், பிராத்தனைகளும்” என்று பதிவிட்டுள்ளார்.  

லதா மங்கேஷ்கர் அம்மாவின் இசைப்பயணம், வாழ்க்கையில் சாதிக்க நினைக்கும் அனைவருக்கும் ஒரு எடுத்துக்காட்டு!" - பாடகர் மனோ