பள்ளி மாணவர்களுக்கு நவதானியம் வாழைப்பழம் கவர்னர் தமிழிசை அமைச்சர் நமச்சிவாயம் ஆலோசனை

புதுச்சேரி

பள்ளி மாணவர்களுக்கு நவதானியங்கள், வாழைப்பழம் வழங்குவது தொடர்பாக கவர்னர் தமிழிசை சவுந்தரராஜனுடன் அமைச்சர் நமச்சிவாயம் ஆலோசனை நடத்தினார்.

புதுவையில் கொரோனா தொற்று பாதிப்பு குறைந்துள்ள நிலையில் பள்ளி, கல்லூரிகள் திறக்கப்பட்டுள்ளன. பள்ளிகளில் கடந்த காலங்களில் ரொட்டி, பால், பிஸ்கெட் போன்றவை வழங்கப்பட்டு வந்தன. மேலும் கடந்த கால காங்கிரஸ் ஆட்சியின்போது தமிழக முன்னாள் முதல்-அமைச்சர் கருணாநிதியின் பெயரில் காலை சிற்றுண்டி திட்டமும் தொடங்கப்பட்டது.

ஆனால் இந்த திட்டங்கள் தற்போது நடைமுறையில் இல்லை. அதேநேரத்தில் மதிய உணவு திட்டம் மட்டும் செயல்படுத்தப்பட்டு வருகிறது. அட்சய பாத்ரா அமைப்பின் மூலம் நாள்தோறும் சுடச்சுட மாணவர்களுக்கு மதிய உணவு வழங்கப்பட்டு வருகிறது. இந்த திட்டத்தின் மூலம் சுமார் 55 ஆயிரம் மாணவர்கள் பயனடைந்து வருகிறார்கள்.

இந்த நிலையில் மாணவர்களுக்கு மேலும் சத்தான உணவு பொருட்களை வழங்க திட்டமிடப்பட்டு உள்ளது. இதுதொடர்பாக கவர்னர் தமிழிசை சவுந்தரராஜனுடன், கல்வித்துறை பொறுப்பு வகிக்கும் உள்துறை அமைச்சர் நமச்சிவாயம் ஆலோசனை நடத்தினார்.

இந்த ஆலோசனை தொடர்பாக கவர்னர் மாளிகை வெளியிட்டுள்ள செய்திக்குறிப்பில் கூறியிருப்பதாவது:-

புதுச்சேரியில் உள்ள பள்ளிக்கூடங்களில் வகுப்பறைகளை கணினி மயமாக்கி டிஜிட்டல் முறையில் கற்க உள்கட்டமைப்பு வசதிகள் மேம்பாடு செய்வதற்கும், பள்ளிகளில் உள்ள கழிப்பறைகளை மேம்படுத்தி சுத்திகரிக்கப்பட்ட குடிநீர் கிடைப்பதற்கும், மதிய உணவில் நவதானியங்கள், கருப்பட்டி, வேர்க்கடலை, வாழைப்பழம் போன்ற சத்தான உணவுகளை சேர்ப்பதற்கும் தேவையான ஆலோசனையையும் அறிவுரையையும் கவர்னர் தமிழிசை சவுந்தரராஜன் வழங்கினார்.

புதிய கல்விக்கொள்கையின் படி மாணவர்களுக்கு பள்ளிகளிலும், கல்லூரிகளிலும் அவர்களது உடல் ஆரோக்கியத்துக்கு தேவையான சத்தான உணவுகளை வழங்குவதோடு அதை கண்காணிக்க வலியுறுத்தப்பட்டது.

வருகிற 2023-ம் ஆண்டை நவதானியங்கள் ஆண்டாக உலக உணவு, விவசாயஅமைப்பு சார்பில் கொண்டாடப்பட உள்ளது. அதை முன்னின்று நடத்துவதற்கு இந்தியா தேர்ந்தெடுக்கப்பட்டுள்ளது என்பதை இந்த நேரத்தில் பதிவு செய்ய விரும்புவதாக கவர்னர் தமிழிசை சவுந்தரராஜன் தெரிவித்துள்ளார்.

இவ்வாறு அந்த செய்திக்குறிப்பில் கூறப்பட்டுள்ளது.