ரூ 89 லட்சம் மோசடி வழக்கு 3 ஆண்டுகளாக தலைமறைவாக இருக்கும் வாலிபர் தேடப்படும் குற்றவாளியாக போலீசார் அறிவிப்பு

காரைக்கால்

ரூ.89 லட்சம் மோசடி செய்த    வழக்கில்,  3 ஆண்டுகளாக தலைமறைவாக இருக்கும் வாலிபரை தேடப்படும் குற்றவாளியாக போலீசார் அறிவித்துள்ளனர்.

காரைக்கால் மாரியம்மன் கோவில் தெருவை சேர்ந்தவர் சுவாமிநாதன். இவரது மகன் சத்தியன் (வயது 35). இவர் சென்னையை சேர்ந்த பாலசுப்ரமணியன் என்பவரிடம் பங்கு சந்தையில் பணம் செலுத்தினால் இரட்டிப்பாக கிடைக்கும் என்று ஆசை வார்த்தை கூறினார். இதை உண்மை என்று நம்பிய பாலசுப்பிரமணின் கடந்த 2019-ம் ஆண்டு   ரூ.89  லட்சத்தை சத்தியனிடம் கொடுத்துள்ளார். பணத்தை பெற்றுக்கொண்ட சத்தியன், அதனை பங்கு சந்தையில் செலுத்தாமல் மோசடி செய்ததாக கூறப்படுகிறது. 

தான் ஏமாற்றப்பட்டதை உணர்ந்த பால சுப்பிரமணியன், காரைக்கால் நகர போலீசில் புகார் செய்தார். அதன்பேரில் போலீசார் வழக்குப்பதிவு செய்து விசாரணை நடத்தினர். 3 ஆண்டுகள் ஆகியும் இன்னும் சத்தியன் குறித்து எந்த தகவலும் கிடைக்கவில்லை. 

இந்தநிலையில் காரைக்கால் மாவட்ட சீனியர் போலீஸ் சூப்பிரண்டு நிகரிகாபட் உத்தரவின் பேரில் காரைக்கால் நகர போலீசார் சத்தியனை தேடப்படும் குற்றவாளியாக அறிவித்துள்ளனர். அவர் குறித்து தகவல் கிடைத்தால் போலீஸ் நிலையத்துக்கு தகவல்   கொடுக்குமாறு போலீசார் கேட்டுக்கொண்டுள்ளனர்.

====