பிரதமா், கவர்னரை வம்புக்கு இழுத்தால் கடுமையான விளைவுகளை சந்திக்க நேரிடும் - தி.மு.க.வுக்கு அண்ணாமலை எச்சரிக்கை

கரூர்,

நகர்ப்புற உள்ளாட்சி தேர்தலில் கரூர் மாவட்ட பா.ஜ.க. சார்பில் போட்டியிடும் வேட்பாளர்களை ஆதரித்து மாநில தலைவர் அண்ணாமலை நேற்று கரூர் மாவட்டத்தில் புகழூர் கடைவீதி ரவுண்டானா, கரூர் வெங்கமேடு, லைட் ஹவுஸ் கார்னர், ராயனூர், குளித்தலை பஸ் நிலையம், அரவக்குறிச்சி ஆகிய பகுதிகளில் பிரசாரம் மேற்கொண்டார். கரூரில் பா.ஜ.க. வேட்பாளர்களை ஆதரித்து மாநில தலைவர் அண்ணாமலை பேசியதாவது:-

பா.ஜ.க.வை பொறுத்தவரை ஒவ்வொரு மனிதனுடைய வாழ்க்கையிலும் முன்னேற்றம் ஏற்பட வேண்டும் என நினைக்கின்ற கட்சி.

தமிழகத்தில் மட்டும் 11 மருத்துவக்கல்லூரிகளை தற்போது திறந்து வைத்துள்ளோம். 8 மாத காலமாக தி.மு.க.வின் ஆட்சியை பார்த்துகொண்டு இருக்கிறீர்கள். எவ்வளவு பேருக்கு விடிந்தது. எனக்கு தெரிந்து யாருக்கும் விடிந்ததாக தெரியவில்லை.

பிரதமர் மோடி கொண்டு வருகிற ஒவ்வொரு திட்டத்திலும் ஸ்டிக்கர் ஒட்டி, அது தி.மு.க.வின் திட்டமாக விளம்பரம் படுத்துகிறார்கள். அதையெல்லாம் உடைப்பதற்கு இது ஒரு வாய்ப்பு. தற்போது தி.மு.க.வினர் மிரட்ட ஆரம்பித்து விட்டார்கள். மத்தியில் ஆட்சியில் பா.ஜ.க. இருக்கிறது என்பதை தி.மு.க.வினர் மறந்துவிடாதீர்கள். பா.ஜ.க. வேட்பாளர்களை பணி செய்யவிடாமல் போஸ்டரை கிழிப்பது, பேனரை கிழிப்பது, அவர்களை மிரட்டுவது, வீடுகளுக்கு வரும் தண்ணீரை நிறுத்துவது, தொழிலில் தொந்தரவு செய்வது என சீண்டினால் தி.மு.க.வினருக்கு வட்டியும், முதலுமாக சேர்த்து கொடுக்கப்படும்.

இப்போதைய பா.ஜ.க. பழைய பா.ஜ.க. அல்ல. இது புது பா.ஜ.க.. தேவையில்லாமல் தமிழக கவர்னரை சீண்டுவது, பிரதமரை சீண்டுவது சரியானது அல்ல. தி.மு.க. தப்புக்கணக்கு போட்டு வருகிறது. அதன் விளைவுகளை தி.மு.க. அரசு சந்திக்க வேண்டியிருக்கும். இன்னும் 4 ஆண்டுகள் அந்த அரசு இருக்குமா? இருக்காதா? என்பது அவர்கள் செயல்படுவதைப் பொறுத்து இருக்கிறது. முழுமையாக மத்திய அரசை அனுசரித்து சென்றால் 4 ஆண்டுகள் பதவியில் இருப்பார்கள். மத்திய அரசுக்கு எதிராக செயல்பட்டால் தமிழகத்தில் புதிய பா.ஜ.க., தி.மு.க.விற்கு வட்டியும் முதலுமாக சேர்த்து அவர்களுக்கு கொடுக்கும்.

இவ்வாறு அண்ணாமலை பேசினார்.