தமிழகத்தில் இதுவரையில் இல்லாத அளவு 300-க்கும் கீழ் கொரோனா பாதிப்பு குறைந்தது

சென்னை,

தமிழகத்தில் கொரோனா பாதிப்பு தொடர்ந்து குறைந்து கொண்டே வருகிறது. இதுதொடர்பாக நேற்றைய கொரோனா பாதிப்பு குறித்து மருத்துவம் மற்றும் மக்கள் நல்வாழ்வுத்துறை வெளியிட்டுள்ள செய்திக்குறிப்பில் கூறப்பட்டிருப்பதாவது:-

தமிழகத்தில் நேற்று புதிதாக 52 ஆயிரத்து 935 பேருக்கு கொரோனா பரிசோதனை செய்யப்பட்டது. இதில் 163 ஆண்கள், 129 பெண்கள் என மொத்தம் 292 பேருக்கு புதிதாக கொரோனா உறுதி செய்யப்பட்டுள்ளது. இந்த வகையில் இதுவரை இல்லாத அளவு கொரோனா பாதிப்பு 300-க்கும் கீழ் குறைந்துள்ளது. இதில் அதிகபட்சமாக சென்னையில் 83 பேரும், கோவையில் 43 பேரும், செங்கல்பட்டில் 34 பேரும், நீலகிரியில் 15 பேரும் பாதிக்கப்பட்டுள்ளனர். குறைந்தபட்சமாக அரியலூர், தர்மபுரி, கள்ளக்குறிச்சி, கரூர், மயிலாடுதுறை, நாகப்பட்டினம், புதுக்கோட்டை ஆகிய 7 மாவட்டங்களில் நேற்று புதிதாக ஒருவருக்கு கூட கொரோனா தொற்று உறுதி செய்யப்படவில்லை.

ஆஸ்பத்திரியில் சிகிச்சை

இதில் 12 வயதுக்குட்பட்ட 41 குழந்தைகளுக்கும், 60 வயதுக்கு மேற்பட்ட முதியவர்கள் 46 பேருக்கும் தொற்று உறுதி செய்யப்பட்டுள்ளது. தமிழகத்தில் இதுவரை 6 கோடியே 33 லட்சத்து 83 ஆயிரத்து 390 பேருக்கு கொரோனா பரிசோதனை செய்யப்பட்டு, 34 லட்சத்து 50 ஆயிரத்து 333 பேருக்கு கொரோனா உறுதி செய்யப்பட்டுள்ளது.

தமிழகத்தில் நேற்றைய நிலவரப்படி 899 பேர் ஆஸ்பத்திரியில் அனுமதிக்கப்பட்டு சிகிச்சை பெற்று வருகின்றனர். இதில் 429 பேர் ஆக்சிஜன் வசதி கொண்ட படுக்கைகளிலும், 159 பேர் தீவிர சிகிச்சை பிரிவிலும் சிகிச்சை பெற்று வருகின்றனர்.

ஒருவர் உயிரிழப்பு

தமிழகத்தில் நேற்று கொரோனா பாதிப்பால் திருவள்ளூர் மாவட்டத்தை சேர்ந்த 86 வயது முதியவர் ஒருவர் உயிரிழந்தார். 37 மாவட்டங்களில் உயிரிழப்பு இல்லை. தமிழகத்தில் இதுவரை மொத்தம் 38 ஆயிரத்து 10 பேர் கொரோனா நோய்தொற்றால் உயிரிழந்து உள்ளனர். இத்தொற்று பாதிப்பில் இருந்து நேற்று 778 பேர் ‘டிஸ்சார்ஜ்’ செய்யப்பட்டுள்ளனர். சிகிச்சையில் 3 ஆயிரத்து 950 பேர் உள்ளனர்.

இவ்வாறு அதில் கூறப்பட்டுள்ளது.