திருப்பூர்: வீடு புகுந்து திருடிய சகோதர கொள்ளையர்கள் கைது..!

திருப்பூர்,

இதுகுறித்து போலீஸ் தரப்பில் கூறப்படுவதாவது;

பல்லடம் அருகே உள்ள பருவாய் கிராமத்தைச் சேர்ந்த பிரபு (38), திருப்பூரில் உள்ள ஒரு கம்பெனியில் மேலாளராக பணிபுரிகிறார். இவர் தனது குடும்பத்துடன் சென்னை சென்றுவிட்டுக் கடந்த 4ம் தேதி வீட்டிற்கு வந்த போது பூட்டு உடைக்கப்பட்டிருந்ததைக் கண்டு அதிர்ச்சி அடைந்தனர். உள்ளே சென்று பார்த்த போது, பீரோல் உடைக்கப்பட்டு லாக்கரில் வைக்கப்பட்டிருந்த 5 பவுன் தங்க நகைகள் கொள்ளை அடிக்கப்பட்டிருந்தது. இச்சம்பவம் குறித்து காமநாயக்கன்பாளையம் போலீசார் வழக்குப்பதிவு செய்து விசாரித்து வந்தனர். மேலும் திருப்பூர் மாவட்ட போலீஸ் சூப்பிரண்ட் உத்தரவின் பேரில் தனிப்படை அமைக்கப்பட்டு தீவிரமாகத் தேடி வந்தனர்.

இந்நிலையில், இன்று காலை பல்லடம் அருகே காமநாயக்கன்பாளையம் போலீசார் வாகன சோதனையில் ஈடுபட்டிருந்தனர். அப்போது ஆம்னி வேனில் வந்த 2 வாலிபர்களை விசாரணை செய்த போது முன்னுக்குப்பின் முரணாக பதிலளித்தனர். இதனால் சந்தேகமடைந்த போலீசார் அவர்களை காமநாயக்கன்பாளையம் போலீஸ் நிலையம் அழைத்துச் சென்று விசாரணை செய்ததில் அவர்கள் மயிலாடுதுறையைச் சேர்ந்த அன்பழகன் மகன் தமிழ்ச்செல்வன் (32) மற்றும் அவரது தம்பி மாதவன் (29), என்பதும் இருவரும் சேர்ந்து பிரபு வீட்டில் 5 1/2பவுன் நகையும், கடந்த 20.1.2022ல் அவிநாசிபாளையம் போலீஸ் நிலைய எல்லைக்குட்பட்ட நிதிஷ் கிருஷ்ணன் வீட்டில் 12 1/2 பவுன் நகை கொள்ளையடித்தது தெரியவந்தது. மேலும் அவர்கள் ஓட்டி வந்த ஆம்னி வேன் வெள்ளகோயில் காவல் நிலையத்துக்கு உட்பட்ட பகுதியில் திருடியதும் தெரியவந்தது. 

இதையடுத்து அவர்களைக் கைது செய்த போலீசார் 18 பவுன் தங்க நகைகள், ஆம்னி வேன் ஆகியவற்றைப் பறிமுதல் செய்து பல்லடம் நீதிமன்றத்தில் ஆஜர்படுத்தி சிறையில் அடைத்தனர். இந்நிலையில் தமிழ்ச்செல்வன் மீது பல்வேறு போலீஸ் நிலையங்களில் 30 வழக்குகளும், மாதவன் மீது 10 வழக்குகளும் உள்ளன. சகோதரர்கள் இருவரும் பூட்டியிருக்கும் வீடுகளைக் குறிவைத்துத் திருடுவதையே தொழிலாக வைத்திருந்தனர். கொள்ளையர்களைப் பிடித்த காமநாயக்கன்பாளையம் இன்ஸ்பெக்டர் ரவி, சப் இன்ஸ்பெக்டர்கள் விஜயகுமார், குழந்தைவேலு, உள்ளிட்ட தனிப்படை போலீசாரை, திருப்பூர் மாவட்ட போலீஸ் சூப்பிரண்ட் சசாங் சாய் பாராட்டினார்.