மேகதாது அணை விவகாரம்: தமிழக சட்டமன்றத்தில் தீர்மானம் நிறைவேற்ற வேண்டும்

சென்னை,

காவிரி நடுவர் மன்ற தீர்ப்பிற்கு முற்றிலும் முரணான வகையில், சுப்ரீம் கோர்ட்டில் வழக்கு நிலுவையில் உள்ள நிலையில், “மேகதாது உள்ளிட்ட நீர்ப்பகிர்வு திட்டங்கள் குறித்து விவாதிப்பதற்காக அனைத்து கட்சி கூட்டம் கூட்டப்படும் என்றும், இது குறித்து கர்நாடக சட்டமன்றத்தில் விவாதிக்கப்படும் என்றும், இந்த திட்டத்திற்கு ஒப்புதல் அளிக்குமாறு மத்திய நீர்வளத்துறை மந்திரியை கேட்டுக்கொள்ள போவதாகவும், இதனை செயல்படுத்துவதற்கான அனைத்து சட்ட வாய்ப்புகளையும் ஆராய்வோம்” என்றும் கர்நாடக மாநில முதல்-மந்திரி கூறியிருக்கிறார்.

அதேநேரத்தில், சில நாட்களுக்கு முன்பு பெங்களூருவில் செய்தியாளர்களை சந்தித்த மத்திய நீர்வளத்துறை மந்திரி, “மேகதாது அணை விவகாரத்தில் மத்திய அரசு தலையிடாது. இப்பிரச்சினையை கர்நாடகம் மற்றும் தமிழ்நாடு அரசுகள் பேச்சுவார்த்தை மூலம் தீர்த்துக்கொள்ள வேண்டும். பேச்சுவார்த்தைக்கு ஏற்பாடு செய்ய மத்திய அரசு தயாராக இருக்கிறது” என்று கூறியிருக்கிறார்.

தமிழகத்தின் உரிமையை பறிக்கும் செயல்

மேகதாதுவில் அணை கட்ட முயற்சிக்கும் கர்நாடக மாநிலத்தின் இந்த நிலைப்பாடு காவிரி நதிநீர் பங்கீட்டில் தமிழ்நாட்டிற்கு உள்ள உரிமையை பறிக்கும் செயலாகும். மேகதாது அணை கட்டப்பட்டால், காவிரி ஆற்றில் இருந்து கீழ்மடை மாநிலமான தமிழ்நாட்டிற்கு வருகின்ற உபரி நீரும் நின்று விடும் சூழ்நிலை ஏற்படும்.

காவிரி நீரை நம்பி விவசாயம் செய்யும் விவசாயிகள் பெரிதும் பாதிக்கப்படுவார்கள். வேளாண் உற்பத்தி வெகுவாக பாதிக்கப்படும். இன்னும் சொல்லப்போனால், வேளாண் தொழிலே முடங்கும் சூழ்நிலை உருவாகும் என்பதும் அனைவரும் அறிந்த ஒன்றாகும்.

தீர்மானம் நிறைவேற்ற வேண்டும்

எனவே, எந்த சூழ்நிலையிலும் மேகதாது அணை கட்டப்படுவது கட்டாயம் தடுத்து நிறுத்தப்பட வேண்டும் என்பதும், பேச்சுவார்த்தை என்ற பேச்சுக்கே இடமில்லை என்பதும்தான் தமிழ்நாட்டின் நிலைப்பாடு. இதில் யாருக்கும் எவ்வித மாறுபட்ட கருத்தும் இருக்க முடியாது.

எனவே முதல்-அமைச்சர் உடனடியாக தலையிட்டு, அனைத்து கட்சி கூட்டத்தை கூட்டவும், மேகதாது அணை கட்டப்படும் என்ற கர்நாடக அரசின் கோரிக்கையை நிராகரிக்க மத்திய அரசை வலியுறுத்தி தமிழ்நாடு சட்டமன்ற பேரவையில் ஒரு தீர்மானத்தை நிறைவேற்றவும், பேச்சுவார்த்தை என்ற பேச்சுக்கே இடமில்லை என்பதை அழுத்தந்திருத்தமாக தெளிவுபடுத்தவும் உரிய நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.