9-ம் வகுப்பு மாணவி தற்கொலை: உடலை வாங்க மறுத்து உறவினர்கள் சாலை மறியல்

நாமக்கல்,

நாமக்கல் மாவட்டம் திருச்செங்கோடு சீத்தாராம்பாளையம் சக்திவேல் நகரை சேர்ந்தவர் அர்ச்சனா (வயது 14). திருச்செங்கோடு அரசு பெண்கள் மேல்நிலைப்பள்ளியில் 9-ம் வகுப்பு படித்து வந்தார்.

இந்நிலையில், நேற்று முன்தினம் பள்ளிக்கு சென்ற அர்ச்சனா, மதியம் பள்ளியின் 2-வது மாடியில் இருந்து கீழே குதித்து தற்கொலை செய்து கொண்டார்.

தலைவி பொறுப்பில் இருந்து நீக்கம்

இந்த சம்பவம் குறித்து தகவல் அறிந்த அர்ச்சனாவின் பெற்றோர், உறவினர்கள் திரண்டனர். அவர்கள் மாணவி உடலை பார்த்து கதறி அழுதனர். பின்னர், இரவு 8 மணிக்கு பள்ளி முன்பு மறியலில் ஈடுபட்டனர். இதனால் அங்கு போக்குவரத்து பாதிக்கப்பட்டது.

இதுகுறித்து தகவல் அறிந்த போலீசார், கல்வித்துறை அதிகாரிகள் அங்கு விரைந்து சென்று போராட்டத்தில் ஈடுபட்டவர்களிடம் பேச்சுவார்த்தை நடத்தினர்.

அப்போது மாணவியின் உறவினர்கள், அரசு பள்ளி தமிழ் ஆசிரியை, அர்ச்சனாவை செய்யாத தவறுக்கு கண்டித்ததாகவும், வகுப்பு தலைவி பொறுப்பில் இருந்து நீக்கியதாகவும், இதனால் தான் மனமுடைந்து தற்கொலை செய்து கொண்டதாகவும் தெரிவித்தனர். தொடர்ந்து அவர்கள் சாலை மறியலை கைவிட மறுத்தனர்.

உடலை வாங்க மறுப்பு

இதுகுறித்து தகவல் அறிந்த மாவட்ட போலீஸ் சூப்பிரண்டு சரோஜ்குமார் தாக்கூர் அதிரடிப்படையினருடன் அங்கு வந்தார். பின்னர், அவர் மாணவியின் உறவினர்களிடம் பேச்சுவார்த்தை நடத்தியதையடுத்து அவர்கள் மறியலை கைவிட்டனர்.

இந்நிலையில், நேற்று மாணவியின் உடல் திருச்செங்கோடு அரசு ஆஸ்பத்திரியில் பிரேத பரிசோதனை செய்யப்பட்டது. ஆனால் பெற்றோர், உறவினர்கள், ஆசிரியை அருள் செல்வியை கைது செய்யும் வரை உடலை வாங்க மாட்டோம் என்று கூறினர். திடீரென அவர்கள் ஆசிரியையை கைது செய்யக்கோரி திருச்செங்கோடு நகர போலீஸ் நிலையம் முன்பு சாலை மறியலில் ஈடுபட்டனர்.

பரபரப்பு

இதனால் பரமத்திவேலூர் சாலையில் போக்குவரத்து பாதிக்கப்பட்டது. இதையடுத்து மாவட்ட போலீஸ் சூப்பிரண்டு அவர்களிடம் பேச்சுவார்த்தை நடத்தினார். உடனே பெற்றோர், உறவினர்கள் சாலை மறியலை கைவிட்டனர். இதையடுத்து அந்த பகுதியில் போக்குவரத்தை போலீசார் சீரமைத்தனர்.

மேலும், திருச்செங்கோடு நகர போலீஸ் நிலையம், அரசு ஆஸ்பத்திரியில் போலீசார் குவிக்கப்பட்டுள்ளனர்.