தற்போதைய தொழில்நுட்பத்தை பயன்படுத்தி ஆயிரம் ஆண்டு பழமையான கோவில்களை போல கட்டமுடியாது- சென்னை ஐகோர்ட்டு

சென்னை ஐகோர்ட்டில் ஸ்ரீரங்கத்தைச் சேர்ந்த ரங்கராஜன் நரசிம்மன் என்பவர் தாக்கல் செய்துள்ள கோர்ட்டு அவமதிப்பு வழக்கில், ‘ஐகோர்ட்டு உத்தரவிட்டும் அதை மீறும் வகையில் சுசீந்திரம் தாணுமாலய சாமி கோவிலில் ஓவியங்கள் அழிக்கப்பட்டு அந்த சுவற்றில் வெள்ளையடிக்கப்படுகிறது.  நாமக்கல் சோளீஸ்வரர் கோவிலின்

பழமையான கற்கள் உடைக்கப்படுகின்றன’ என்று கூறியிருந்தார்.

இந்த வழக்கு நீதிபதிகள் ஆர்.மகாதேவன், பி.டி.ஆதி கேசவலு ஆகியோர் கொண்ட சிறப்பு டிவிசன்பெஞ்ச் முன்பு விசாரணைக்கு வந்தது. அப்போது, மனுதாரர் கூறும் இந்த குற்றச்சாட்டு குறித்து விசாரணை நடத்திவருவதாகவும், ஈரோட்டில் உள்ள கோவில் ஒன்றின்பொங்கல் மண்டபம் இடிக்கப்பட்ட விவகாரத்தில் அந்தக் கோவிலின் செயல் அலுவலர் பணியிடை நீக்கம் செய்யப்பட்டுள்ளதாகவும் இந்து சமய அறநிலையத்துறை சார்பில் தெரிவிக்கப்பட்டது.

அப்போது நீதிபதிகள், ‘தற்போதுள்ள நவீன தொழில்நுட்பத்தை பயன்படுத்தினாலும், ஆயிரம் ஆண்டுகளுக்கு முன்பு கட்டப்பட்ட கோவில்களை போல அற்புதமான கட்டுமானத்துடனும், சிறந்த தொழில் நுட்பத்துடனும், முறையான ஆகம விதிகளுடன் கட்டமுடியாது. அதனால் பழமையான கோவில்களை முறையாக புனரமைத்து சிறப்பாக பாதுகாக்க வேண்டும்’ என்று கருத்து தெரிவித்தனர். பின்னர் விசாரணையை2 வாரத்துக்கு தள்ளிவைத்தனர்.