கஞ்சாவுடன் 3 பேர் கைது

வில்லியனூர் போலீஸ் இன்ஸ்பெக்டர் ராமு தலைமையில் போலீசார் கூடப்பாக்கம் மேட்டுபகுதியில் உள்ள மைதானம் அருகே ரோந்து பணியில் ஈடுபட்டனர். அப்போது அங்கு சந்தேகத்துக்கு இடமான முறையில் நின்று கொண்டிருந்த ஒருவரை பிடித்து விசாரணை நடத்தினர்.

விசாரணையில் அவர், அம்பேத்கர் நகரை சேர்ந்த மாறன் என்ற மணிமாறன் (வயது 22) என்பதும், கஞ்சா விற்றதும் தெரியவந்தது. இதையடுத்து அவரை போலீசார் கைது செய்தனர். மேலும் அவருக்கு, அதே பகுதியை சேர்ந்த தமிழ் என்ற தமிழகன் (29), கடலூர் மாவட்டம் விருத்தாசலத்தை சேர்ந்த தந்தை பெரியார் நகரை சேர்ந்த பழனிவேல் (29) ஆகியோர் கஞ்சா சப்ளை செய்தது தெரியவந்தது. இதையடுத்து அவர்களையும் போலீசார் கைது செய்தனர். அவர்களிடம் இருந்து 1 கிலோ 800 கிராம் கஞ்சா பறிமுதல் செய்யப்பட்டது.