கவர்னரின் பாதுகாப்பு வாகனங்கள் மீது கற்கள், கொடிகள் வீசப்படவில்லை: முதல்-அமைச்சர் விளக்கம்

சென்னை,

சட்டசபையில் நேற்று நேரமில்லா நேரத்தில் கவர்னர் பாதுகாப்பு விவகாரம் தொடர்பாக எதிர்க்கட்சி தலைவர் எடப்பாடி பழனிசாமி, நயினார் நாகேந்திரன், (பா.ஜ.க.), செல்வபெருந்தகை (காங்கிரஸ்) ஆகியோர் பேசினர்.

இதற்கு பதில் அளித்து முதல்- அமைச்சர் மு.க.ஸ்டாலின் பேசியதாவது:-

உண்மை இல்லை

நேரமில்லா நேரத்தைப் பயன்படுத்தி அரசிடம் கேள்வியைக் கேட்கின்றபோது, அதற்குரிய பதிலை அவர்கள் பொறுமையாக இருந்து கேட்டு, அதிலே அவர்களுக்கு உடன்பாடு இல்லை என்று சொன்னால், வெளிநடப்பு செய்யட்டும், நான் வேண்டாமென்று சொல்லவில்லை. அதுதான் மரபு. ஆனால், அவர்களுக்கே தெரிந்துவிட்டது. இதிலே பதில் சொல்கிறபோது, நாம் என்னென்ன செய்திருக்கிறோம் என்று சொல்வார்கள் என்பது அவர்களுக்கு தெரியும்.

தர்மபுரம் ஆதீனத்தை கவர்னர் சந்திக்க திருக்கடையூர் கோவிலில் இருந்து புறப்பட்டுச் சென்றபோது, அவருடைய வருகைக்கு எதிர்ப்பு தெரிவித்து நடைபெற்றிருக்கக்கூடிய போராட்டத்திற்கு எடுக்கப்பட்ட நடவடிக்கைகள் குறித்து கூடுதல் டி.ஜி.பி. (சட்டம்-ஒழுங்கு) தெளிவாக ஓர் அறிக்கையைக் கொடுத்திருக்கிறார். அவர் குறிப்பிட்டிருக்கக்கூடிய ஒன்றை நான் இந்த அவையில் பதிவு செய்ய விரும்புகிறேன்.

‘இந்த ஆர்ப்பாட்டத்தில் கவர்னருடைய பாதுகாப்பு வாகனங்கள் (கான்வாய்) மீது கற்கள், கொடிகள் வீசியதாக கூறப்படுவதில் எந்த உண்மையும் இல்லை. காவல் துறையினர், ஆர்ப்பாட்டத்தில் ஈடுபட்டவர்களைத் தடுப்புகள் அமைத்து, கட்டுப்பாட்டுக்குள் வைத்திருந்தனர். பின்னர், அவர்களைக் கைது செய்து வாகனங்களில் ஏற்றினர். வாக்குவாதம் செய்து, பிளாஸ்டிக் பைப்புகளில் கட்டப்பட்டிருந்த கொடிகளை வீசி எறிந்திருக்கிறார்கள் என்பதுதான் உண்மை’ என்பதை காவல் துறை கூடுதல் இயக்குனர் மிகத் தெளிவாக, மிக விளக்கமாக வெளிப்படுத்தியிருக்கிறார்.

பதிலை கேட்காமல் போய் விட்டார்

அதேபோல, கவர்னரின் ஏ.டி.சி. ஒரு செய்தியை வெளியிட்டிருக்கிறார். டி.ஜி.பி.க்கு ஒரு கடிதத்தை அனுப்பி வைத்திருக்கிறார். அதிலே அவர் கடைசியாக குறிப்பிட்டிருப்பது, கவர்னர் மற்றும் அவரது பாதுகாப்பு வாகனங்கள் கற்களோ, கொடிகளோ மற்றும் எந்த பொருட்களாலும் பாதிக்கப்படாமல் காவல் துறையால் பாதுகாக்கப்பட்டன என்ற செய்தியை கவர்னருடைய பாதுகாப்பு அதிகாரி, காவல் துறை இயக்குனருக்கு கடிதம் மூலம் குறிப்பிட்டுக் காட்டியிருக்கிறார்.

ஆனால், இதுதான் நமக்கு வாய்ப்பு, இதை அரசியலுக்காக நாம் பயன்படுத்திட வேண்டும் என்று நினைத்திருக்கிறார்கள். இது அரசியல் கட்சிகளுக்கு சாதாரணமாக இருக்கக்கூடிய இயல்புதான். பொதுவாக, அ.தி.மு.க.விலே இருக்கக்கூடிய அந்த ஒருங்கிணைப்பாளர்கள் 2 பேரும் திட்டமிட்டு சேர்ந்து தான் அறிக்கை கொடுப்பார்கள். இங்கேயிருக்கக்கூடிய எதிர்க்கட்சி தலைவர் மற்றும் எதிர்க்கட்சி துணைத்தலைவர் ஆகிய இரண்டு பேரும் சேர்ந்துதான் அறிக்கை கொடுப்பார்கள்.

ஆனால், இந்த அறிக்கை மட்டும் தனித்தனியாக வந்தது. அப்பொழுதே நீங்கள் புரிந்து கொள்ளலாம். அதிலே குறிப்பாக, எதிர்க்கட்சி தலைவர், அவருடைய அறிக்கையிலே கடைசியாக, ‘தமிழக கவர்னர் மீது தாக்குதல் நடத்திய சம்பவத்திற்கு காவல் துறையைத் தனது கையில் வைத்திருக்கக்கூடிய இந்த விடியா அரசினுடைய முதல்-அமைச்சர் என்ன பதில் சொல்லப்போகிறார்’ என்று சொல்லிவிட்டு, இப்போது பதிலை கேட்காமலேயே போய்விட்டார். அதுதான் எனக்கு வருத்தமாக இருக்கிறது.

சட்டப்பூர்வ நடவடிக்கை

அதேபோல, எதிர்க்கட்சியினுடைய துணைத்தலைவர் தனியாக ஓர் அறிக்கையைக் கொடுத்திருக்கிறார். அவர் கடைசியாக சொல்வது; இன்னும் மென்மையாக சொல்லியிருக்கிறார். ‘மேற்படி வன்முறைச் சம்பவத்தில் ஈடுபட்டவர்களைக் காவல் துறை உடனடியாக கண்டறிந்து, அவர்களைச் சட்டத்தின்முன் நிறுத்தி, உரிய தண்டனையைப் பெற்றுத் தர நடவடிக்கை எடுக்க வேண்டும் என்று கேட்டுக்கொள்கிறேன்’ என்று சொல்லியிருக்கிறார். இது நியாயமாக இருக்கிறது.

அங்கே போராட்டம் நடத்தியவர்கள் மீது உரிய வழக்கு பதிவு செய்யப்பட்டிருக்கிறது. சட்டப்பூர்வ நடவடிக்கை தொடர்ந்து எடுக்கப்பட்டு வருகிறது. கவர்னரின் பாதுகாப்பிற்காக மத்திய மண்டல காவல் துறை தலைவராக இருக்கக்கூடிய ஐ.ஜி. தலைமையில் இரண்டு டி.ஐ.ஜி.க்கள், 6 எஸ்.பி.க்கள், 6 கூடுதல் எஸ்.பி.க்கள், 21 டி.எஸ்.பி.க்கள், 54 ஆய்வாளர்கள், 102 உதவி ஆய்வாளர்கள் மற்றும் 1,120 காவலர்கள் பயன்படுத்தப்பட்டு, அவருடைய பயணம் பாதுகாப்பாக இருந்தது என்று உறுதி செய்யப்பட்டிருக்கிறது.

சமரசம் செய்து கொள்ளாது

ஆர்ப்பாட்டத்தில் கவர்னரின் பாதுகாப்பு வாகனங்கள் மீது கற்கள் வீசப்பட்டன, கொடிகள் வீசப்பட்டன என்பது ஓர் அபாண்டமான குற்றச்சாட்டு. ஆர்ப்பாட்டத்தில் ஈடுபட்டவர்களைக் காவல் துறையினர் தடுப்புகள் அமைத்து, கட்டுப்பாட்டிற்குள் வைத்திருந்தனர் என்பதுதான் உண்மை. ஜனநாயக ரீதியில் ஆர்ப்பாட்டம் நடத்தினாலும், கவர்னருடைய பாதுகாப்பில் இந்த அரசு உரிய நடவடிக்கைகளை முறையாக எடுத்திருக்கிறது. கவர்னருக்கு உரிய பாதுகாப்பினை அளிப்பதில் இந்த அரசு எந்த சமரசமும் செய்து கொள்ளாது என்பதை நான் உறுதியோடு இந்த அவையிலே பதிவு செய்ய விரும்புகிறேன்.

இந்த நிகழ்வை வைத்துக்கொண்டு, கவர்னரை பயன்படுத்தி அரசியல் செய்யலாம் என எதிர்க்கட்சி தலைவரும், எதிர்க்கட்சி துணைத்தலைவரும் எண்ணுகிறார்கள். நான் உறுதியாக சொல்கிறேன், அது நடக்கவே நடக்காது, இது தி.மு.க. ஆட்சி. சாத்தான்குளத்திலே நடைபெற்ற சம்பவம் குறித்து இன்றைக்கும் பேசிக்கொண்டிருக்கிறோம். அதேபோல, தூத்துக்குடி ஸ்டெர்லைட் ஆலை போராட்டத்தின் போது நடைபெற்ற துப்பாக்கி சூடு சம்பவம். அந்த சம்பவத்தை பற்றி அன்றைக்கு முதல்-அமைச்சராக இருந்தவரிடம் கேட்டபோது, எனக்கு தெரியவில்லையே என்று சொன்னார். அப்படி சொன்னவர்தான் இவர். ஆனால், இன்றைக்கு இவர் சட்டம்-ஒழுங்கை பற்றி பேசுவதுதான் வேடிக்கையாக இருக்கின்றது.

யார் ஆட்சியில்?

அ.தி.மு.க. ஆட்சியில் கவர்னராக இருந்த மறைந்த சென்னா ரெட்டிக்கு என்ன நடந்தது?. திண்டிவனத்தில் 10-4-1995 அன்று கவர்னர் சென்னாரெட்டியும், அவரது பாதுகாப்பு வாகனமும் 15 நிமிடங்களுக்கு மேல் அங்கே மறிக்கப்பட்டு, ஆபத்தான நிலையில் நடுரோட்டில் நின்றது யாருடைய ஆட்சியில்?. அ.தி.மு.க. எம்.எல்.ஏ.க்கள் 4 பேர் தலைமையில் சரமாரியாக கல் எறிந்திருக்கிறார்கள், முட்டையை வீசியிருக்கிறார்கள், தக்காளியை வீசி அவமானப்படுத்தியிருக்கிறார்கள். இன்னும் சொல்லப்போனால், சென்னா ரெட்டி உயிர் தப்பினார்” என்று அன்றைக்கு தலைப்பு செய்தியாக பத்திரிகைகளில் வந்தது. இது யாருடைய ஆட்சியில்?.

தாக்குதலுக்கு உள்ளான கவர்னரை திரும்பப்பெற வேண்டும் என்று இதே அவையில், அ.தி.மு.க. ஆட்சியில் ஒரு தனித் தீர்மானமே கொண்டு வரப்பட்டது என்று இங்கே கு. செல்வப்பெருந்தகை குறிப்பிட்டுச் சொன்னார். நாவலர் தான் அந்த தீர்மானத்தை முன்மொழிந்து, அது இந்த அவையிலே நிறைவேற்றப்பட்டது என்பதும் உங்களுக்கு தெரியும்.

கவர்னர் மட்டுமல்ல; மிகப்பெரிய சட்டப்பதவியில் இருந்த தலைமை தேர்தல் ஆணையர் மறைந்த டி.என்.சேஷன் தாஜ் ஓட்டலில் இருந்து வெளியே வரவே முடியவில்லை. அதெல்லாம் அ.தி.மு.க. ஆட்சியினுடைய சாதனைகள். விமான நிலையத்தில் இருந்து விரட்டியடித்து, அவர் சென்னையில் இருக்கக்கூடிய தாஜ் கோரமண்டல் ஓட்டலுக்கு வந்த பிறகு, அந்த ஓட்டலையும் முற்றுகையிட்டு, கல்வீசி தாக்குதல் நடத்தியது யாருடைய ஆட்சியில்? அவர்கள் ஆட்சியில்தான்.

நடக்காத ஒன்றை நடந்ததாக...

ஏன்? இன்றைக்கு பா.ஜ.க.வில் ஒரு முக்கியஸ்தராக இருக்கக்கூடிய சுப்பிரமணியசாமி, சென்னை ஐகோர்ட்டு வளாகத்திற்குள்ளேயே சென்று தாக்குதல் நடத்த முயன்று, அவரை அசிங்கப்படுத்திய ஆட்சி உங்களுடைய ஆட்சி, அ.தி.மு.க. ஆட்சி. எல்லாவற்றிற்கும் மேலாக, ஒரு பெண் ஐ.ஏ.எஸ். அதிகாரி சந்திரலேகா மீது ஆசிட் வீசிய ஆட்சி, யாருடைய ஆட்சி? எல்லாம் அ.தி.மு.க. ஆட்சியில் தான் நடைபெற்றன.

எனவே, இந்த அரசைப் பொறுத்தவரையில், நான் தெளிவாக, உறுதியாக சொல்ல விரும்புகிறேன். காவல் துறை ஆர்ப்பாட்டம் நடத்தியவர்களைத் தடுத்திருக்கிறது. கவர்னர் மீது ஒரு தூசு கூட விழாதவாறு மிகவும் பாதுகாப்பாக அழைத்துச் சென்றிருக்கிறது. அதுமட்டுமல்ல; ஆர்ப்பாட்டத்தில் ஈடுபட்டவர்கள் மீது வழக்குகளும் பதிவு செய்யப்பட்டு, விசாரணையும் மேற்கொள்ளப்பட்டிருக்கிறது.

ஆகவே, அரசியல் சட்டப் பதவிகளில் இருப்பவர்களைக் காப்பாற்ற, அவர்களுக்குரிய பாதுகாப்பினை அளித்திட, இந்த அரசுக்கு பொறுப்பு இருக்கிறது. அந்த கடமையை காவல் துறை செவ்வனே நிறைவேற்றிக்கொண்டிருக்கிறது. ஆகவே, தங்கள் ஆட்சியில் கவர்னரை கல், முட்டை, தக்காளி என வீசி தாக்கியதை எல்லாம் மனதில் வைத்து கொண்டு, நடக்காத ஒன்றை நடந்ததாக கற்பனையாக இங்கே கூறி அரசியல் செய்ய வேண்டாம்.

இங்கேயிருந்து வெளிநடப்பு செய்திருந்தாலும், அவர்களுக்கு இந்த செய்தி போகும் என்ற காரணத்தினால்-எதிர்க்கட்சி தலைவர், எதிர்க்கட்சி துணைத்தலைவரை நான் மிகுந்த மரியாதையோடும், மதிப்போடும் கேட்டுக்கொள்கிறேன். ஆகவே, இதுகுறித்து இந்த விளக்கமே போதும் என்று கருதுகிறேன்.

இவ்வாறு அவர் பேசினார்.