கொரோனாவால் இறந்தவர்களின் குடும்பத்தினர் கருணை தொகை பெற 90 நாட்களுக்குள் விண்ணப்பிக்க வேண்டும் காரைக்கால் மாவட்ட கலெக்டர் அறிவுறுத்தல்

காரைக்கால், 

காரைக்கால் மாவட்ட கலெக்டர் அர்ஜூன்சர்மா வெளியிட்டுள்ள செய்திக்குறிப்பில் கூறியிருப்பதாவது:-

கொரோனா காரணமாக குடும்ப உறுப்பினர்களை இழந்து வாடும் குடும்பத்தினருக்கு ரூ.50 ஆயிரம் கருணைத் தொகை அளிக்கப்படுகிறது. காரைக்கால் மாவட்டத்தில் இதுவரை 287 பேர் தொற்றால் இறந்துள்ளனர்.

கொரோனா இறப்பு தொடர்பாக தவறான முறையில் பயன் பெறுவதை தடுப்பதற்காக சுப்ரீம் கோர்ட்டு கால வரையறை      வகுத்துள்ளது. அதன்   அடிப்படையில் 20.3.2022-க்கு முன்பு நிகழ்ந்த இறப்பு தொடர்பாக, 24.3.2022 முதல் 60 நாட்களுக்குள் தங்கள் விண்ணப்பத்தை சமர்ப்பிக்கவேண்டும். இனிவரும் காலங்களில் கொரோனாவால் உயிரிழப்பு ஏற்பட்டு கருணைத்தொகை பெற விரும்புவோர், இறப்பு நிகழ்ந்த 90 நாட்களுக்குள் விண்ணப்பிக்கவேண்டும்.

தவிர்க்க முடியாத காரணத்தினால், வரையறை செய்யப்பட்ட காலத்திற்குள் விண்ணப்பிக்க இயலாதவர்கள், குறை தீர்ப்பு குழுவினர் மூலமாக விண்ணப்பித்து பயனடையலாம். தவறான முறையில் விண்ணப்பத்தை சமர்ப்பித்து நிவாரணம் பெற முற்படுவோர், பேரிடர் மேலாண்மை சட்டத்தின் கீழ் தண்டிக்கப்படுவார்கள்.

இவ்வாறு அதில் கூறப்பட்டுள்ளது.