சமயபுரம் ஆட்டுச்சந்தையில் ரூ.1 கோடிக்கு ஆடுகள் விற்பனை - வியாபாரிகள் மகிழ்ச்சி...!

சமயபுரம், 

திருச்சி மாவட்டம் சமயபுரம் ஒத்தக்கடை பகுதியில் உள்ள ஆட்டுச்சந்தை மிகவும் பிரபலமானதாகும். ஒவ்வொரு வாரமும் சனிக்கிழமை அன்று ஆட்டுச்சந்தை இங்கு கூடுவது வழக்கம். 

சராசரியாக ஒவ்வொரு வாரமும் குறைந்த பட்சம் 25 லட்சத்தில் இருந்து 50 லட்சம் வரை ஆடுகள் விற்பனையாகும். ரம்ஜான், பக்ரீத், தீபாவளி உள்ளிட்ட பண்டிகை காலங்களில் சுமார் ஒரு கோடியிலிருந்து ரூ.2 கோடி வரை ஆடுகள் விற்பனையாகும்.

இந்த ஆட்டு சந்தைக்கு திருச்சி, கரூர், அரியலூர், பெரம்பலூர், புதுக்கோட்டை, சேலம்,கெங்கவல்லி, ஆத்தூர்,விருதுநகர், கள்ளக்குறிச்சி உள்ளிட்ட பல்வேறு மாவட்ட பகுதிகளில் இருந்தும் வியாபாரிகள் லாரி, வேன் உள்ளிட்ட பல்வேறு வாகனங்களில் ஆடுகளை இங்கு வந்து விற்பனை செய்வார்கள். அதேபோல ஆடுகளை வாங்குவதற்காக பல்வேறு ஊர்களில் இருந்தும் வியாபாரிகள் ஏராளமானோர் இந்த சந்தைக்கு வருவார்கள்.

இந்நிலையில் ரம்ஜான் பண்டிகை முன்னிட்டு ஆடுகளை விற்பனை செய்வதற்காக நூற்றுக்கணக்கான ஆட்டு வியாபாரிகள் காலையிலிருந்தே பல்வேறு வாகனங்களில் ஆடுகளை கொண்டு வந்து இறக்கினார்கள். 

ஆடுகளை வாங்குவதற்காக வியாபாரிகள் மற்றும் பொதுமக்கள் குவிந்தனர். இதனால் ஒரு ஆடு சுமார் 6 ஆயிரத்திலிருந்து 15 ஆயிரம் வரை விலை போனது. ஆடுகளை போட்டிபோட்டுக்கொண்டு பொதுமக்கள் மற்றும் வியாபாரிகள் வாங்கி சென்றதால் விற்பனையாளர்கள் மகிழ்ச்சி அடைந்தனர்.

இந்த சந்தையில் இன்று மட்டும் சுமார் ரூ.1 கோடி வரை ஆடுகள் விற்பனையானதாக வியாபாரி ஒருவர் தெரிவித்தார்.