கீழடியில் 8-ம் கட்ட அகழாய்வு செப்டம்பர் மாதம் நிறைவடையும் - தொல்லியல்துறை தகவல்

சிவகங்கை,

சிவகங்கை மாவட்டம் கீழடியில் மத்திய, மாநில அரசுகள் சார்பில் பல்வேறு கட்டங்களாக அகழாய்வு பணிகள் நடைபெற்று வருகின்றன. இதுவரை அங்கு 7 கட்ட அகழாய்வுகள் நடந்து முடிந்துள்ளன. இதில் பானைகள், முதுமக்கள் தாழிகள், ஆபரண பொருட்கள் உள்பட பண்டைய தமிழர்கள் பயன்படுத்திய நூற்றுக்கணக்கான பழங்கால பொருட்கள் கண்டுபிடிக்கப்பட்டன. 

இதனை தொடர்ந்து கடந்த பிப்ரவரி மாதம் கீழடியில் 8-ம் கட்ட அகழாய்வு பணி தொடங்கியது. இதற்காக 5 குழிகள் தோண்டப்பட்டு அகழாய்வு பணிகள் நடைபெற்று வருகின்றன. இந்நிலையில் தொல்லியல் துறையின் கொள்கை விளக்க குறிப்பில், கீழடியில் நடைபெற்று வரும் 8-ம் கட்ட அகழாய்வு பணிகள் வரும் செப்டம்பர் மாதம் நிறைவு பெறும் என கூறப்பட்டுள்ளது. 

அதே போல் கங்கை கொண்ட சோழபுரத்தில் நடைபெற்று வரும் 2-ம் கட்ட அகழாய்வு, வெம்பக்கோட்டை மற்றும் துலுக்கர்பட்டியில் நடைபெற்று வரும் அகழாய்வுப் பணிகளும் வரும் செப்டம்பர் 30-ந்தேதிக்குள் நிறைவடையும் என தெரிவிக்கப்பட்டுள்ளது. மேலும் சங்க கால கொற்கை துறைமுகத்தின் கடலோரத்தில் முன்கள ஆய்வுப்பணிகள் ஓரிரு தினங்களில் தொடங்க உள்ளதாகவும் தெரிவிக்கப்பட்டுள்ளது.